Ci moža pradavacca aŭtentyčnaja narodnaja muzyka biez papsovych prycharošvańniaŭ? Hurt «Huda» nie baicca eksperymentavać na sabie: 25 traŭnia jon daść solny kancert u Teatry estrady.
«Huda» repetuje ŭ mienskim peduniversytecie. Šukajučy jaje ŭ tamtejšych labiryntach, možna kiravacca na hałasy, što poŭniać hułkija ŭviečary kalidory. Nijakaha muzyčnaha supravadžeńnia. Nijakich prycharošvańniaŭ. Aŭtentyka i čyścinia.
«My viedajem, pra što śpiavajem», — nie biaz honaru kažuć udzielnicy hurtu. Kab rekanstrujavać falklor, treba hruntoŭnaja tearetyčnaja padrychtoŭka. Naprykład, aśpirantura Instytutu mastactvaznaŭstva etnahrafii j falkloru, jakaja ŭ balšyni spadaryń z «Hudy» ŭžo za plačyma. Hetym hurt i roźnicca ad bieźličy inšych folk-kalektyvaŭ. Kab pravilna śpiavać abradavyja pieśni («Huda pracuje pieravažna ź imi), nieabchodna całkam razumieć, štoadčuvaŭ vykanaŭca, što paznačaje kožny element, zvarot. Jašče adzin prafesijny pryncyp — nikoli nie śpiavać «kaladnych piesień u žnivo, a žniŭnych — na Kalady», bo tak nia budzie rabić nivodnaja babulka, navat kali falklaryst-źbiralnik vielmi paprosić.
Rekanstrujavanyja «Hudaj» pieśni paŭstajuć u maksymalna čystym vyhladzie. Vykanalnicki ehaizm, i adpaviedna «papsovaść», źviedzienyja da minimumu. Nijakaha šoŭ, nijakaha biznesu. Ci moža pradavacca taki pradukt? Vidać, moža, kali na jaho spakušajucca aŭdyjopiraty. Pieśni «Hudy», nie spytaŭšy dazvołu, vyviesili na svaim internet-sajcie rasiejskija pahancy. U anatacyi dysk charaktaryzujecca jak «słavianskije piesnopienija», a słova «biełaruski» adsutničaje naahuł.
Druhi prykład «pradavalnaści» niepapsovaj aŭtentyki — irlandzkaja muzyka. Zhadka pra dychtoŭna vydadzienyja śpievy j najhryšy Zialonaje vyspy vyklikaŭ skrušny ŭzdych va ŭdzielnic «Hudy». «Irlandcy tak piśmienna, dabrotna padnieśli etničny materyjał! Śviet słuchaje j dzivicca — nibyta niama ničoha lepšaha. A tut ža ŭsia sprava ŭ padačy: kab našyja śpievy, našu mitalohiju tak padać, było b jašče j lepiej!»
Poŭny varyjant artukułu čytajcie ŭ hazecie "Naša Niva"
Siarhiej Mikulevič
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary