700 dalaraŭ za čatyry chviliny

Videaklip — heta maleńki kinafilm. Z paŭnafarmatnym kino ŭ nas prablemy — «Słuckaja» niedaciahnuła, «Akupacyju» zabaraniajuć, — a voś klipy zdymajucca ci nie štodnia. Piać hadoŭ tamu ŭ Biełarusi było try specyjalisty-klipmejkiery, ciapier ich lik pajšoŭ na dziasiatki. U ratacyi «Pieršaha muzyčnaha kanału» znachodzicca kala sotni klipaŭ ajčynnych muzykaŭ. Maładyja ŭśviedamlajuć, što videaŭvasableńnie ich hitu — adzin z hałoŭnych čyńnikaŭ raskrutki. Ale, ź inšaha boku, takoje mastactva vymahaje vydatkaŭ, jakija mohuć i nie akupicca.

Zdymki videaklipu duetu «Alaksandra i Kanstancin» na kampazycyju «Moj Halilej», jakuju jany praśpiavali 12 traŭnia na «Eŭrabačańni», abyšlisia ŭ dobruju kapiejčynu. Pradusavaŭ klip asabista hieneralny pradusar BT Uładzimier Maksimkaŭ. Aŭtaram idei i režyseram klipu vystupiŭ Maksim Nosaŭ. U zdymkach brali ŭdzieł rycary klubu «Orden Paŭnočnaha chramu», kaskadziory z trukavaha teatru Viačasłava Arkunova i klubu kaskadzioraŭ «Duał dens» dy dziasiatak aktoraŭ. «Narmalnaje kino možna źniać i za čatyry tysiačy dalaraŭ», — skazaŭ u adnym ź interviju režyser mastackaha filmu «Akupacyja» A.Kudzinienka. Kolki ž kaštuje źniać narmalny klip?

Tak było

Videasupravadžeńni da piesień pačali zdymać jašče ŭ 70-ja. Tak, telerežyser Valer Piestaŭ stvaryŭ u Biełarusi rolik da pieśni «Ja — robat» (vykonvali Alaksandar Čarnaŭski i Ŭładzimier Maciecki) ŭ śniežni 1973 h. — pieršy takoha rodu pradukt va ŭsim SSSR. Naturalna, što zdymali na stužku «Pieśniaroŭ», «Vierasoŭ». Jak praviła, heta byli karotkametražnyja dakumentalnyja filmy.

Moda ž na sapraŭdny klip — jak vobraznaje ŭvasableńnie muzyčnaha tvoru — raspačałasia pry kancy 80-ch. Pieršaprachodcami stali rokiery — mienavita tady źjavilisia videašerahi da piesień «Bondy», «Miascovaha času», «Mroi» i «Ŭlisu». Pieršamu klipu — na bondaŭskuju pieśniu «Ŭra» ŭžo šasnaccać hadoŭ. Tady režysery asabliva nie napružvalisia: «ćvik» siužetu zhadanaha klipu — ludzi, što skačuć z voknaŭ. Uvohule ŭrbanistyka była ŭ modzie. Klip «Mroi» «Ja rok-muzykant» źniali mienš čym za hadzinu na budoŭli adnaho z hmachaŭ pa vuł.Charužaj pozna ŭviečary. A voś muzykanty navapołackaha «Miascovaha času» biaź lišniaje ścipłaści zdymali klip na pieśniu «Moj dom» u Safijskim sabory. Jak zhadvaje hitaryst «MČ» Valer Drako, «prarvalisia» jany ŭ chram taksama ŭnačy, załahodziŭšy zaŭchoza (!) niekalkimi butelkami harełki. Siońnia aŭdyjovizualnaja moda zusim inšaja, i tyja klipy vyklikajuć chiba histaryčnuju cikavaść.

Dźvie premjery na tydzień

Kaciaryna Niavinskaja viadzie ŭ BDU speckurs klipaznaŭstva, jaki doŭha i nudna nazyvajecca «Videaklip u struktury aŭdyjovizualnaj kamunikacyi». Šyrokamu hledaču-melamanu jana bolš viadomaja z supolnaj pracy z hurtom «Krambambula»: heta taja samaja «nieznajomka z «Absentu». Pavieličeńnie kolkaści klipaŭ jana tłumačyć pierš za ŭsio pašyreńniem medyjnaj prastory. Tak, u prahramie Biełaruskaj televizii «Klip-abojma» 2-3 premjery na tydzień. Bolej za 100 klipaŭ znachodzicca ŭ ratacyi «Pieršaha muzyčnaha kanału». Kruciać ich na TV biaspłatna. Ciapier amal kožny muzykant razam sa svaim albomam ci synhłam vypuskaje klip. Choć jak reklamny chod heta moža i nie spracavać. Naprykład, albom Łarysy Hrybalovaj, klipu jakoj na pieśniu «Što-niebudź» nia bačyŭ tolki toj, chto nia maje televizara, značna sastupaje ŭ prodažach dysku Alaksieja Chlastova, jaki klipaŭ nia maje. Bo «klip — heta srodak stvareńnia infarmacyjnaha pola vakoł siabie, nia bolš za toje», — kaža K.Niavinskaja. Režyser Anatol Viečar miarkuje, što hrošy, patračanyja na klip, paprostu nie viartajucca, tamu prystojny klip mohuć dazvolić sabie adno zamožnyja muzyki.

Hanarary — ad sotki da tysiačy

...

Poŭny varyjant artukułu čytajcie ŭ hazecie "Naša Niva"

Siarhiej Budkin

• 0
• 0
• 0
• 0
• 0
• 0
• 0
• 0