Chronika

6 vieraśnia z Akademii MUS vyklučyli aktyvista «Maładoha frontu» Sieržuka Saviča, jaki ŭdzielničaŭ uletku ŭ akcyi pratestu suprać raźmiaščeńnia rasiejskaj radyjolakacyjnaj stancyi pad Hancavičami.

Na pačatku vieraśnia z pracy zvolnieny vyłučency ŭ kandydaty ad PBNF nastaŭnik historyi Alaksiej Siudak (Vialejski rajon), pedahoh-psycholah Volha Łahvinovič (Maładečna), a taksama siabar inicyjatyŭnaj hrupy Z.Sałaŭjova enerhietyk Mikoła Pratasievič (Vušacki rajon), zvalnieńnie pahražaje Alesiu Miechu (Kobryń).

Staršynia Ahulnarespublikanskaha strajkamu pradprymalnikaŭ Valer Levanieŭski i jahony namieśnik Alaksandar Vasiljeŭ 7 vieraśnia asudžany na dva hady kalonii ahulnaha režymu kožny za abrazu honaru i hodnaści prezydenta i arhanizacyju masavaj vuličnaj akcyi, 9 vieraśnia Levanieŭski abviaściŭ haładoŭku, bo jamu niama dzie spać u kamery.

20 žniŭnia Mininfarmacyi prypyniła vychad «Priedprinimatielskoj haziety» : maŭlaŭ, taja źmianiła tematyku i peryjadyčnaść vychadu, nie paviedamiŭšy ŭ ministerstva. 24 žniŭnia ministerstva prypyniła vydańnie hazety «Vriemia» na 3 miesiacy (maŭlaŭ, prablemy ź jurydyčnym adrasam). 31 žniŭnia Mienski abłasny sud adchiliŭ skarhu aktyvistki AHP Ludmiły Ščarbovič z Žodzina na dziejańni abłvykankamu i abłsavietu pry farmavańni akruhovych kamisij. Aktyvist AHP ź vioski Čyść Maładačanskaha rajonu Ŭładzimier Źviernik 31 žniŭnia byŭ zvolnieny z pracy, paśla taho jak vyrašyŭ balatavacca ŭ deputaty. Z 1 vieraśnia ŭ Žodzinie likvidavali adzinuju ŭ horadzie treciuju biełaruskamoŭnuju klasu. U Homieli Biełaruska-słavianskaja himnazija imia Ivana Mieleža (adzinaja biełaruskamoŭnaja škoła) pierajšła ź vieraśnia na vykładańnie pryrodaznaŭčych dyscyplin pa-rasiejsku. Juryst mižrehijanalnaj niezarehistravanaj pravaabarončaj arhanizacyi «Viasna Paazierja» Alaksiej Łukaševič 2 vieraśnia aštrafavany na 3 b.v. za ŭdzieł 3 lipienia ŭ hramadzkim hałasavańni nakont treciaha prezydenckaha terminu. 2 vieraśnia Kryčaŭski sud aštrafavaŭ siabra BSDH, patencyjnaha kandydata ŭ deputaty Mikałaja Hierdzija za abrazu sakratarki vybarčaj kamisii na 1 b.v. Miniust 3 vieraśnia znoŭ admoviŭ u rehistracyi Partyi svabody i prahresu, pryčyna — «parušeńnie paradku stvareńnia partyi». Ad staršyni Łahojskaj supołki PBNF Źmitra Ševiela čynoŭniki Łahojskaha rajvykankamu 3 vieraśnia zapatrabavali zvolnicca z pracy albo źniać svaju kandydaturu z vybaraŭ. Centralny sud Miensku 6 vieraśnia nie zadavoliŭ skarhi advakatki Viery Stramkoŭskaj, jakaja prasiła pryznać dalejšaje ŭtrymańnie Michaiła Maryniča pad vartaj niezakonnym, Stramkoŭskaja źviarnułasia sa skarhaj u Viarchoŭny sud. 7 vieraśnia patencyjny kandydat u deputaty Źmicier Barodka atrymaŭ u pašparcie štamp, jaki dazvalaje vyjezd za miažu, ale 13 vieraśnia jaho zmusili zvolnicca z pracy. Viarchoŭny sud 7 vieraśnia pakinuŭ pravamocnym papiaredžańnie, vyniesienaje Miniustam na adras PKB za ŭdzieł u kaalicyi «5+». Aktyvist «Maładoha frontu» Źmicier Daškievič byŭ asudžany na 10 sutak aryštu za toje, što 7 vieraśnia na mitynhu na Kastryčnickaj płoščy skandavaŭ «Hańba!» padčas abviaščeńnia referendumu. Kvateru aktyvista AHP, namieśnika dyrektara vydavieckaha domu «Vriemia» Alaksandra Cynkieviča 7 vieraśnia trojčy naviedali supracoŭniki milicyi. Pry raspaŭsiudžvańni hazety «Zubr» u Miensku byli zatrymanyja aktyvisty adnajmiennaj arhanizacyi Maksim N., Alena M. i Alaksiej S. Prafsajuz REPAM 7 vieraśnia źviarnuŭsia ŭ Viarchoŭny sud sa skarhaj na rašeńnie Miniustu ab admovie ŭ rehistracyi źmien i dadatkaŭ u statut arhanizacyi. Pretendentcy ŭ kandydaty ad BSDP (NH) Volzie Karač Viciebskaja akruhovaja kamisija №19 vyniesła papiaredžańnie. U Voršy 8 vieraśnia kiraŭnictva haradzkoha centru kultury zabaraniła mienskaj supołcy «Pahonia» i aršanskamu klubu «Renesans» pravodzić raniej uzhodnienuju mastackuju vystavu da 490-ch uhodkaŭ Aršanskaj bitvy. Pravaabaronca Valer Ščukin byŭ źbity 8 vieraśnia ŭ Miensku nieviadomymi, jakija nie zabrali ŭ jaho nijakich rečaŭ. Akruhovaja kamisija Hłybockaj akruhi 9 vieraśnia admianiła papiaredžańnie pretendentu ad PBNF Jarasłavu Biernikoviču. Za raspaŭsiud hazety «Zubr» 9 vieraśnia zatrymany aktyvisty adnajmiennaj arhanizacyi Alaksiej Šydłoŭski, Alaksandar Atroščankaŭ, Nadzieja Chaładzinskaja, Maryna Lebiedzieva, Maksim Hromaŭ, Darja Małdavanava, Alaksandar Uško, Alaksiej Laŭkovič, na ŭsich skłali pratakoły. Laŭkoviča zatrymali paŭtorna 11 vieraśnia i aštrafavali na 30 b.v. U Homieli 11 supracoŭnikaŭ KDB i milicyi sarvali seminar maładych sacyjał-demakrataŭ, pryśviečany referendumu i parlamenckim vybaram. Asabliva cikavilisia sacyjał-demakratam sa Švecyi Albenam Dalenam, jakoha zaviali ŭ asobny kabinet, pytali pra metu vizytu ŭ Biełaruś, zdymali na videakameru. 11 vieraśnia supracoŭniki milicyi j abłasnoj upravy justycyi, spasyłajučysia na terakty ŭ Maskvie, praviali pravierku haradzienskaj siadziby BNF «Adradžeńnie» padčas sustrečy aktyvistaŭ arhanizacyi z pradstaŭnikom HA «Partnerstva». Padčas pasiadžeńnia sojmu PBNF 11 vieraśnia milicyjanty akružyli siadzibu partyi, zatrymlivali j abšukvali tych, chto ź jaje vychodziŭ. Staršynia Viarchoŭnaha sudu Valancin Sukała 14 vieraśnia adchiliŭ skarhu kiraŭnika Biełaruskaj partyi pracy Alaksandra Buchvostava na rašeńnie VS pra likvidacyju partyi. Pa 20 b.v. štrafu atrymali 14 vieraśnia Jaŭhien Vaładźko, Siarhiej Adaduraŭ i Viačasłaŭ Sinharaŭ za niesankcyjavany pikiet u Salihorsku suprać treciaha prezydenckaha terminu.

AŠ

• 0
• 0
• 0
• 0
• 0
• 0
• 0
• 0