Hałoŭnaj pryčynaj uručeńnia ordena Skaryny Viačasłavu Trubnikavu staŭ jahony 60-hadovy jubilej.
Adnak jubilej byŭ u krasaviku, a Łukašenka ŭznaharodziŭ rasiejskaha hienerała tolki paśla taho, jak 3 žniŭnia Trubnikava vyzvalili ad pasady pieršaha namieśnika zamiežnych spraŭ Rasiei i naznačyli pasłom u Indyi. Vidać, uznaharoda znajšła svajho hieroja za niejkija minułyja zasłuhi.
10 studzienia 1996 h. Trubnikaŭ byŭ naznačany dyrektaram Słužby zamiežnaj raźviedki RF, źmianiŭšy Jaŭhiena Prymakova. Trubnikaŭ zaŭsiody ličyŭsia i ličycca členam kamandy Prymakova. U studzieni 1998 h. jon staŭ hienerałam armii. Dahetul nivodzin z kiraŭnikoŭ rasiejskaj raźviedki nie ŭdastojvaŭsia takoha vysokaha voinskaha zvańnia. Cikava, što dahetul cyrkuluje niajasnaja infarmacyja pra toje, što ŭ 1999 h. Trubnikavu było nadadziena zvańnie Hieroja Rasiei.
Z prychodam Pucina ŭ Kreml u 2000-m Trubnikaŭ akazaŭsia na pasadzie pieršaha namieśnika ministra zamiežnych spraŭ, kuryrujučy spravy SND.
Što moh jon zrabić karysnaha dla Łukašenki? Za hady raboty dyrektaram SZR — ščodra dzialicca zamiežnaj infarmacyjaj. Asabliva toj, što datyčyła susiedziaŭ Biełarusi, jakija zrabilisia členami NATO. Bo reštki savieckaj ahientury za miažoj, jak i ŭłasnaść byłoha SSSR, pierajšli da RF. Nu, a staŭšy ŭ MZS kurataram SND, — dziejsna prykryvać Łukašenku ŭ mižnarodnych strukturach. Bo SND taksama ž ličycca adnoj z takich struktur.
Nia vyklučana, što ŭznaharoda mahła być uručana nia tolki za minułaje. Viadoma, što Indyja źjaŭlajecca adnym z najbujniejšych pakupnikoŭ vajskovaj techniki. U Biełarusi z Rasiejaj jość cełyja prahramy sumiesnaha abaronnaha zakazu. I rola rasiejskaha pasła ŭ Deli (Trubnikaŭ u 80-ch hadach kiravaŭ rezydenturaj savieckaj raźviedki ŭ Indyi pad prykryćciom žurnalista) ujaŭlajecca značnaj.
Uznaharodziŭšy novaha rasiejskaha pasła, Łukašenka moža raźličvać na dalejšaje ciesnaje supracoŭnictva z tak zvanaj kamandaj Prymakova. Darečy, kažuć, što patryjarch rasiejskaj palityki Prymakoŭ rehularna dzielicca z Pucinym svaimi prahnozami adnosna raźvićcia sytuacyi ŭ Biełarusi.
Raman Jakaŭleŭski
Ciapier čytajuć
Jakaja łohika sudoŭ za Hajun? Mužčyna, jakoha zatrymlivali pa hetaj spravie, apisaŭ ubačanaje22
Kamientary