Salda ŭ plusie
Toje, što ŭrad źbiraŭsia ździejśnić nie raniej jak praź piać hod, adbyłosia sioleta: u studzieni skłałasia stanoŭčaje salda zamiežnaha handlu. Na heta mocna paŭpłyvała nieraźbiarycha z PDV — z Rasiei pačali vieźci mienš tavaru. Takim čynam, u studzieni ekspart dasiahnuŭ $1,118 młrd, a impart — tolki $920,3 młn.
«Krynica» prajhrała
Brovaru «Krynica» daviadziecca viarnuć $1,23 młn rasiejskaj kampanii «Bałtyka». Vyšejšy haspadarčy sud padtrymaŭ adpaviednaje rašeńnie Maskoŭskaha arbitražnaha sudu. Pieršapačatkova «Bałtyka» patrabavała viarnuć joj ažno $3,5 młn. za dapamohu ŭ pieraabstalavańni mienskaha brovaru, jaki ŭrad tak i nie dazvoliŭ pryvatyzavać.
Prosta «BieST»
Treci aperatar sotavaj suviazi standartu GSM śviatkuje svajo naradžeńnie. Ministerstva suviazi i infarmacyi vydała licenziju ZAT «Biełaruskaja sietka telekamunikacyjaŭ». Novy aperatar abaviazany za dva-try hady pakryć suviaźziu terytoryju, na jakoj pražyvaje 90% nasielnictva.
Rybnaja kraina
Biełaruś vyjšła na treciaje miesca ŭ śviecie siarod krain — imparteraŭ śviežamarožanaha sieladcu z Narvehii. 72 biełaruskija pradpryjemstvy štohod uvoziać narveskaj rybki ahulnym koštam $7,5 młn. Rasiejskuju rybu ciapier nabyvajuć usio mieniej i mieniej: kaštuje amal stolki ž, kolki narveskaja, a jakaść maje horšuju.
Nacyjanalizacyja «BiełSieł»
«Biełtelekam» pavialičyŭ da 50% svaju dolu ŭ statutnym fondzie aperatara mabilnaj suviazi «BiełSieł». Heta zrabiłasia mahčymym paśla taho, jak ZAT «Trastbank» (raniej viadomaje jak «Infabank») vyjšła sa składu zasnavalnikaŭ aperatara. Rašeńnie ab vychadzie «Trastbanku» było pryniataje na minułym schodzie akcyjaneraŭ «BiełSieł».
Kalijnyja razborki
Eŭrakamisija pačynaje razhlad mahčymaści admieny antydempinhavych zachadaŭ suprać pastavak u EZ biełaruskich kalijnych uhnajeńniaŭ. Mahčyma, EZ admienić antydempinhavuju pošlinu — ab hetym prosić nia tolki biełaruski ŭrad, ale j Litva, Łatvija, Polšča, Vuhorščyna dy Słavakija — daŭnija partnery «Biełaruśkaliju». Kateharyčna suprać niemcy, jakija abaraniajuć intaresy svajho kancernu «Kali und Salz», jakomu niedaspadoby kankurencyja ź Biełarusi.
Bulba daražeje
Bulba dy inšaja harodnina — lidery pa rostu cen u studzieni—lutym. Cana «druhoha chlebu» vyrasła ad pačatku hodu na 18,5%, na harodninu — na 17,7%. Siarod niecharčovych tavaraŭ najšparčej daražeła presa — na 4,9%. Akramia hetaha, Ministerstva statystyki niejkim čynam vyličyła, što pasłuhi transpartu zrabilisia tańniejšymi na 0,1%.
Valuta zatoki
U 2010 h. krainy Persidzkaj zatoki piarojduć na adzinuju valutu. U vyniku z dalaram dy eŭra budzie spaborničać «dynar zatoki», padmacavany naftavymi rezervami. Užo ŭ 2007 h. budzie stvorany supolny rynak, a potym i valutny fond krain rehijonu. Centralny bank raźmieścicca ŭ stalicy Arabskich Emirataŭ Abu-Dabi.
AK, AFN, BiełTA
Kamientary