mil.by
На брыфінгу Алег Воінаў адзначыў, што ў 2020 годзе ўплыў на стан міжнароднага вайсковага супрацоўніцтва аказалі пандэмія і «непаважлівае стаўленне шэрагу дзяржаў да волевыяўлення беларускага народа».
«Рэакцыя на выбары прэзідэнта была палітызаванай і не накіраваная на развіццё добрасуседскіх адносін. Бягучая сітуацыя (сукупнасць знешніх і ўнутраных пагроз бяспекі) запатрабавала пераацэнкі ваенна-палітычнай абстаноўкі», — адзначыў ён.
На брыфінгу былі «прыведзеныя факты планамернага разгортвання еўрапейскага сегмента сістэмы супрацьракетнай абароны, пачатку функцыянавання ў Польшчы аператыўнай групы штаба 5 АК СВ ЗША і стварэння інфраструктуры, якая забяспечвае размяшчэнне да 20 тысяч амерыканскіх вайскоўцаў, узмацнення разведвальнай актыўнасці і павышэння інтэнсіўнасці палётаў стратэгічнай бамбардзіровачнай авіяцыі ВПС ЗША, дэстабілізуючага фактару вучэнняў «Абаронца Еўропы — 2020».
«Даведзена, што ў выпадку працягу краінамі Захаду палітыкі эскалацыі напружанасці Рэспубліка Беларусь пакідае за сабой права распачаць у 2021 годзе шэраг дадатковых крокаў у галіне нацыянальнай бяспекі», — гаворыцца ў паведамленні.
Таксама да вайсковых аташэ давялі пазіцыю Беларусі «аб неабходнасці канкрэтных і неадкладных дзеянняў па вяртанні ў канструктыўнае рэчышча міжнароднага ўзаемадзеяння ў інтарэсах умацавання міжнароднай і рэгіянальнай бяспекі і канкрэтныя меры іх рэалізацыі».
На брыфінгу таксама было агучана, што Беларусь актыўна вывучае магчымасці задзейнічання свайго міратворчага патэнцыялу: «Мы гатовыя да пашырэння супрацоўніцтва ў гэтай сферы і чакаем вашых прапаноў».
