БТ, 22.10
Адрэналін (Crank)
ЗША – Вялікабрытанія, 2006, каляровы, 87 хв.
Рэжысэры: Марк Нэвэлдайн, Браян Тэйлар
Ролі выконваюць: Джэйсан Стэтгем, Эмі Смарт, Хасэ Пабла Кантыльё, Эфрэн Рамірэз, Дуайт Ёкем, Карлас Санс
Жанр: Крымінальна-кліпавы баявік
Адзнака: 6,5 (з 10)
Наёмнага забойцу атруцілі. Сьмерць наступіць, калі пульс зьнізіцца – і герой мусіць увесь час трымаць высокі ўзровень адрэналіну ў крыві. Для ўзбуджэньня ў ход ідзе ўсё – рэгулярныя перастрэлкі, пагоні на аўто, скрадзеныя лекі й публічны сэкс…
Адрэналінавая інтрыга задае ліхаманкавую дынаміку – зь ірванай музыкай і кліпавым задыханьнем. Але ў фільме знаходзіцца месца й трагікамічным момантам.
НТВ, 23.25
Шалёны Сэсіл Б. (Cecil B. DeMented)
ЗША – Францыя, 2000, каляровы, 87 хв.
Рэжысэр: Джон Ўотэрс
Ролі выконваюць: Мэлані Грыфіт, Стывэн Дорф, Алісія Ўіт, Адрыян Грэн’е, Мэгі Джыленгаал, Лары Джыліард-мл.
Жанр: Іранічная драма-хуліганства
Адзнака: 7 (з 10)
Шалёны кінапартызан Сэсіл Б. (зьдзек з салённага рэжысэра Сэсіла дэ Міля) выкрадае зорку Хані Ўітлак. Цяпер служанка галівудзкага капіталу здымаецца ў фільме, “максымальна набліжаным да рэальнасьці”. Акрамя таго, зорка разам з акторамі-камікадзэ ладзіць дэбошы ў публічных месцах – і зрывае прэм’еры глямурных фільмаў.
Спачатку гераіні гэта не падабалася, але потым яна ўцягнулася ў вясёлую кінагерылью…
Трэш-авангардовец Джон Ўотэрс выказаў усё, што думае пра мэйнстрымны кіч і ягоную індустрыю. Прычым зрабіў гэта ў форме, прымальнай для індустрыі. У адрозьненьні ад залімітнай трэшухі “Ружовы флямінга”, “Шальны Сэсіл Б.” можа дэманстравацца па тэлевізіі.
Але хуліганства ў ім усё роўна хапае.
