У Мінску распачата бясплатная ўстаноўка відэакамер у пад'ездах у межах праграмы «Бяспечны дом».
Аб гэтым паведамляецца ў прэс-рэлізе кампаніі «Стройсвет», якая непасрэдна зоймецца ўстаноўкай абсталявання.
Ініцыятарам праграмы выступіла група прадпрыемстваў, якія працуюць у сферы сістэм бяспекі («Стройсвет дамафон-сэрвіс», «Смартэл-М», «Лазер ЕТС», «Кварц-аўта сэрвіс», «Стройсвет-ПРА»). Апошняя зоймецца непасрэдна ўстаноўкай відэакамер.
Як паведаміў дырэктар кампаніі «Стройсвет-ПРА» Сцяпан Вайцяшонак, мерапрыемствы праграмы «Бяспечны дом» рэалізуюцца з канца 2013 года. «Сёння ў праграме ўжо ўдзельнічаюць 40 пад'ездаў жылых дамоў у Ленінскім, Заводскім, Маскоўскім раёнах. У красавіку—маі 2014 года плануецца зманціраваць сістэмы яшчэ больш як на 60 пад'ездах», — адзначыў ён.
Рэалізацыя праграмы праходзіць у тры этапы.
Першы этап уключае бясплатную замену састарэлых дамафонных сістэм. На другім этапе жыхарам даецца магчымасць індывідуальнай устаноўкі відэадамафонаў у кватэрах, а таксама дадатковых камер на лесвічнай клетцы. І, нарэшце, на трэцім этапе праводзіцца бясплатная ўстаноўка відэакамер у пад'ездах. Гэта частка праграмы праходзіць пры актыўнай падтрымцы ГУУС Мінгарвыканкама.
Аснашчэнне дома відэаназіраннем праводзіцца толькі пры згодзе ўсіх жыхароў або рашэннем праўлення таварыстваў уласнікаў і ЖБК.
Як паведаміла Алена Когут, бясплатнай з'яўляецца ўстаноўкай відэакамер на ўваходзе ў пад'езд. Кошт устаноўкі камеры на лесвічнай клетцы складае 812 тысяч рублёў. Жыхары таксама могуць за свой кошт замовіць устаноўку дадатковых камер на паркоўках, даху, дзіцячай пляцоўцы і г.д.
У планах кампаніі — абсталяваць відэаназіраннем пад'езды ўсіх жылых дамоў у Мінску, жыхары якіх на гэта пагодзяцца. Пасля рэалізацыі ў Мінску праграма будзе распаўсюджвацца і на іншыя гарады Беларусі, адзначыла Когут.
