kremlin.ru
Рашэнне аб выдзяленні Беларусі новага крэдыту Еўразійскага фонду стабілізацыі і развіцця адкладзенае, нягледзячы на тое што Мінск знізіў запыт з 3 да 2 млрд. даляраў, паведаміў журналістам у Маскве 8 снежня міністр фінансаў РФ Антон Сілуанаў.
Паводле яго слоў, пытанне аб выдзяленні крэдыту разглядалася сёння на пасяджэнні рады фонду. «Мы хацелі б атрымання канкрэтных вынікаў ад рэалізацыі праграмы мер эканамічнага развіцця, якія былі закладзеныя ў план дзеянняў пры атрыманні гэтага крэдыту. Пакуль неабходных рашэнняў па рэалізацыі гэтых планаў мы не ўбачылі, таму адклалі прыняцце рашэння аб аказанні фінансавай дапамогі датуль, як убачым канкрэтны вынік», — сказаў ён.
Сілуанаў зазначыў, што існуе адхіленне ад першапачатковых паказчыкаў па росце зарплат бюджэтнікаў у Беларусі і невыкананне шэрагу паказчыкаў, у тым ліку па дынаміцы тарыфаў на паслугі ЖКГ і транспарт.
«Мы хацелі б вызначыць больш значную колькасць структурных мер пры даванні першага траншу, бо ён найбольш ёмісты — 500 млн. з 2 млрд. долараў крэдыту. І мы хацелі б папярэдне пры даванні першага траншу рэалізацыі канкрэтных структурных мер, уключаючы меры ў сферы прыватызацыі, якія не былі рэалізаваныя падчас выканання папярэдняй праграмы. А гэта адна з асноўных крыніцаў пры папаўненні бюджэту і паляпшэнні плацежнага балансу», — сказаў міністр.
Нагадаем, месяцам раней у інтэрв'ю БелаПАН старшыня праўлення Еўразійскага банка развіцця Дзмітрый Панкін паведаміў, што пытанне аб даванні новага крэдыту Беларусі з Еўразійскага фонду стабілізацыі і развіцця будзе вырашанае ў першай дэкадзе снежня. «Наша пазіцыя заключаецца ў тым, што стабілізацыйны крэдыт, які запытала Беларусь, павінен выкарыстоўвацца не на стымуляванне ўнутранага попыту (падтрыманне пэўнага ўзроўню зарплат, крэдытную экспансію.), а для таго, каб эканоміка стала больш збалансаванай і выйшла на больш высокі ўзровень сваёй канкурэнтаздольнасці», — растлумачыў Панкін.
