AFP
Актывіст ісламісцкай групоўкі «Ансар Дайн» Ахмад Махдзі асуджаны судом у Гаазе да дзевяці гадоў турмы за разбурэнне помнікаў архітэктуры, размешчаных у Тымбукту — старажытным горадзе ў цэнтры Малі.
Міжнародны крымінальны суд у Гаазе ўпершыню ў гісторыі слухаў справу пра знішчэнне культурных каштоўнасцяў.
Як было ўстаноўлена ў судзе, Махдзі узначальваў атрад ісламістаў, якія ў 2012 годзе разбурылі гістарычныя будынкі мячэцяў у Тымбукту. Радыкальныя ісламісты лічаць мячэці праявай ідалапаклонства.
Падсудны прызнаў віну і сказаў, што шкадуе пра свае дзеянні. Яму пагражала да 30 гадоў турэмнага зняволення.
Раней суд у Гаазе выпісаў ордэр на арышт Махдзі, і ўрад Нігера выдаў ісламістаў.
***
Ісламісцкая групоўка «Ансар Дайн», у якую ўваходзяць у асноўным туарэгі, падтрымлівае цесныя сувязі з «Аль-Каідай».
Большасць будынкаў у Тымбукту глінабітныя і пабудаваны ў сахельскім стылі. Найбольш буйныя будынкі — мячэці (Саборная мячэць Джынгерэбер, Медрэсэ Санкарэ і Мячэць Сядзі Ях'я).
1 красавіка 2012 г у ходзе чарговага паўстання туарэгаў горад быў захоплены, а 6 красавіка стаў сталіцай самаабвешчанай «Незалежнай Дзяржавы Азавад».
Тады ж на сесіі Камітэта Сусветнай спадчыны ЮНЕСКА Тымбукту быў унесены ў спіс Сусветнай спадчыны як аб'ект, які знаходзіцца пад пагрозай знішчэння.
У ходзе антытэрарыстычнай аперацыі, якая пачалася ў студзені 2013 года, паўстанцы пакінулі горад без бою, аднак пры адступленні спалілі будынак гістарычнага даследчага цэнтра Ахмед Баба, уключаючы бібліятэку. У ёй захоўваліся да 100 тысяч арабскіх і старажытнагрэчаскіх рукапісаў, якія ўваходзяць у спіс Сусветнай спадчыны. Каштоўныя дакументы ўдалося выратаваць.
