У шматпакутным «Газпрам цэнтры» хочуць зрабіць бізнэс-апартаменты
Праект будаўніцтва «Газпрам цэнтра» ў Мінску на скрыжаванні вуліцы Філімонава і праспекта Незалежнасці спрабуюць рэанімаваць.
03.06.2023 / 10:26
Так выглядаў праект «Газпрам цэнтра»
На Нацыянальным прававым інтэрнэт-партале апублікаваны ўказ №162 ад 1 чэрвеня, звярнуў увагу «Рэформ». Ім уносяцца змены ва ўказ 2013 года аб будаўніцтве «Газпрам цэнтра». Дакумент уступіў у сілу з дня яго падпісання. Мінгарвыканкаму даручана заключыць дадатковае пагадненне да інвестдагавора з ААТ «Газпрам трансгаз Беларусь».
Новым указам «Газпрам трансгаз Беларусь» вызваляецца ад выплаты пеняў за невыкананне тэрміну рэалізацыі інвестыцыйнага праекта, налічаных да даты ўступлення ўказа ў сілу. Акрамя таго, кампанія вызваляецца ад арэнднай платы за зямельны ўчастак для комплексу з 1 ліпеня да 31 снежня 2028 года.
Тэрміны рэалізацыі інвестпраекта падаўжаюцца да 2027 года.
З іншых змяненняў ва ўказе вынікае, што ў «Газпрам цэнтры» дазваляецца будаваць бізнэс-апартаменты, пад якімі маюцца на ўвазе шматфункцыянальныя памяшканні. Пры іх будаўніцтве можна кіравацца нормамі і правіламі, вызначанымі для памяшканняў адміністрацыйнага прызначэння і жылых памяшканняў.
Таксама ў адпаведнасці з указам уласнікі, арандатары, лізінгаатрымальнікі бізнэс-апартаментаў, а таксама члены іх сям'і, блізкія сваякі, непрацаздольныя ўтрыманцы могуць рэгістравацца ў такіх памяшканнях (рэгістрацыя па месцы знаходжання). Вызначаны пералік дакументаў для рэгістрацыі.
У інвестыцыйным дагаворы аб будаўніцтве комплексу таксама замацоўваецца права інвестара на змяненне функцыянальнага складу шматфункцыянальнага комплексу, яго асобных частак, у тым ліку да завяршэння іх будаўніцтва. Змены павінны ўзгадняцца з Мінгарвыканкамам і адпавядаць горадабудаўнічым рэгламентам, прыродаахоўным патрабаванням. Яны не павінны прыводзіць да памяншэння аб'ёму інвестыцый, прадугледжанага інвестыцыйным дагаворам.
«Газпрам цэнтр» пачалі будаваць у мінулым дзесяцігоддзі. Яго будоўля ўжо прыпынялася. Затым яна аднаўлялася, быў знойдзены генпадрадчык — італьянская кампанія Codest. Меркавалася, што цэнтр дабудуюць у 2020 годзе. Аднак гэтага не адбылося. У 2021 годзе работы на пляцоўцы прыпыняліся.
«Наша Ніва» падрабязна апісвала эпапею з гэтым цэнтрам:
Трагікамедыя на будоўлі «Газпрам-Цэнтра»: абсталяванне на $20 мільёнаў сапсавалася