Беларус зрабіў самы хуткі дызельны BMW
Генадзь Шэлест з Беларусі мадыфікаваў класічную «пяцёрку» BMW у кузаве Е34. Ды так, што гэта цяпер самая хуткая дызельная машына ў Беларусі, піша «Ганцавіцкі час».
20.06.2023 / 16:09
Самы хуткі дызельны BMW
Аўтамабіль 1990 года выпуску ў свае часы выклікаў трымценне, але цяпер такіх засталося мала. Генадзь даў яму новае жыццё і нават перамог у гонках.
Дзіўна, але мужчына змог запхнуць у старое аўто рухавік ад BMW 2009 года выпуску. І цяпер гэта самы хуткі BMW у Беларусі з дызеляў у кузаве Е34. Гэта адзіны ў свеце такі праект.
У BMW E34 матор ад Е60
«Сабраў яе ў 2020 годзе, і потым яна яшчэ дапрацоўвалася. Гэта цалкам мая пабудова, маімі рукамі сабраная. Для мяне гэта быў дызель. З бензінавай можна было б зняць і больш коней, і яшчэ хутчэй паехаць. Але цікава было зрабіць менавіта дызельную «ракету». Лічыцца ж, што дызелі — гэта трактар, на ім трэба нешта цягаць, а не на гонках ездзіць», — распавёў Генадзь.
Так і было. Генадзь удзельнічаў на ёй у чэмпіянаце Беларусі па драг-рэйсінгу ў 2021 годзе. Заняў першае месца ў сваім класе ў заездзе на 402 метры.
BMW Генадзя перамагла ў заездзе
Наколькі хутка яна паскараецца?
Былі зробленыя замеры, згодна з якімі да сотні кіламетраў за гадзіну яна разганяецца за 4,48 секунды. Дыстанцыю 402 метры едзе за 12,3 секунды.
Вынікі вымярэння хуткасці
Дзівосны вынік для машыны 1990 года. Такіх даных у тыя часы не мела нават М5 («зараджаная» версія пяцёркі BMW). Матор змог выдаць 400 конскіх сіл пры 800 круцячага моманту.
Генадзь — самавук. Круціць машыны і дапрацоўваць іх — яго любімае хобі. Ён кажа, што аўтамабіль прыведзены да выдатнага стану:
«Гэтая 34-ка не корч, машына як у заводскім стане. Усё зроблена максімальна прыгожа. Пад капотам матор стаіць як заводскі. Калі хто не ведае, то і не адрозніць, што ён з машыны на 18 гадоў маладзейшай», — кажа Генадзь.
BMW Гэтая класічная BMW і цяпер выглядае шыкоўна
Расход, мабыць, касмічны?
Вы не паверыце, але расход цалкам адэкватны. Калі не рваць з месца на святлафоры да сотні. Генадзь Шэлест растлумачыў, што машына цалкам падыходзіць для штодзённага кіравання. А не толькі для гонак.
«Рабіў машыну, каб яна кіравалася, каб на ёй можна было ездзіць кожны дзень. І каб з адэкватным расходам. 7 літраў на сотню па трасе яна бярэ. А па горадзе, калі не тапіць, то да 10. Расход як па заводзе ў Е60. Гэта і лагічна, таму што ўся магутнасць у нас на вялікай турбіне, а ездавыя абароты ў прынцыпе не мяняліся. Таму і не жарэ больш на невялікіх абаротах».
І колькі гэта каштавала?
Цяпер Генадзь прадае яе за 15 500 даляраў. А колькі ўклаў за ўвесь час?
«Каб дамагчыся такога выніку, укладзена туды было тысяч з 27 даляраў прыкладна. Там жа не проста звычайная машына. Гэта па факце М5 з маторам ад Е60. Там стаяць тармазы з М5 — самай хуткай машыны ў седане ў 1990-я гады. Салон ўвесь ад М5 Е34, падвеска ўся. Там шмат ад М5. Мог і матор ад М5 паставіць, але ў гэтым няма сэнсу, ён не едзе, як мне трэба».
Гэтая BMW не была такой хуткай нават у 1990-я
Якія планы далей?
Дзіўна, але робячы такі ўнікальны праект, можна сказаць, адзіны ў свеце, у ютубе нічога пра яго няма. Генадзь кажа, што толькі цяпер задумваецца пра ютуб-канал. І магчыма, на ім мы ўбачым іншыя ягоныя мадэрнізаваныя аўто.
«Мне ўсе людзі казалі, што такія крутыя праекты робіш, давай здымаць у ютуб. Усё ніяк не атрымлівалася. Але на дадзены момант думаем пра гэта, у перспектыве. Мы ўжо заканчваем іншую БМВ на 450 конскіх сіл. І хочам пабудаваць самы хуткі дызельны УАЗ Патрыёт на такім маторы».
Іншы BMW, праца над якім заканчваецца, гэта 3-я серыя ў кузаве E46/5. Але туды ўдалося «запхнуць» 450 конскіх сіл.
Гэтую «тройку» БМВ цяпер дапрацоўваюць
Чытайце таксама: