Стала вядома, хто тая загадкавая брунетка, якая суправаджала Абельскую ў Зімбабвэ
На фота з візіту беларускай дэлегацыі медыкаў у Зімбабве звяртае на сябе ўвагу брунетка ў чырвонай сукенцы. Пра яе даведаўся Альянс расследавальнікаў Беларусі.
26.01.2024 / 14:45
На гэтым фотаздымку за жонкай прэзідэнта Зімбабвэ Аксіліяй Мнангагва і Ірынай Абельскай ідзе Дзіна Эль-Дзіэфі Фейсал
На фотаздымку з візіту беларускай дэлегацыі у Зімбабвэ на чале з Ірынай Абельскай — галоўнай доктаркай Рэспубліканскага клінічнага медычнага цэнтру (лечкамісіі) і перадусім маці Колі Лукашэнкі — часта ў кадр трапляла дзяўчына ў чырвонай сукенцы.
Як высветлілі супрацоўнікі Альянсу расследавальнікаў Беларусі, гэта Дзіна Эль-Дзіэфі Фейсал. Яна працуе пластычным хірургам, флеболагам у прыватных медычных цэнтрах «Нардзін» і «Шайн Эст» у Мінску.
Здымак Дзіны Эль-Дзіэфі Фейсал на сайце медычнага цэнтру «Нардзін».
Патрапіць у склад беларускай дэлегацыі дзяўчыне дапамаглі асабістыя сувязі. Расследавальнікі сцвярджаюць, што Дзіна сустракаецца з Дзмітрыем Абельскім, старэйшым сынам Ірыны Абельскай. Ён працуе разам з мамай у лечкамісіі.
Дзмітрый Абельскі вядомы яшчэ і тым, што ў кастрычніку 2020 года тэлефанаваў у міліцыю, каб паскардзіцца на тое, што у ЖК «Каскад» нацягваюць бел-чырвона-белыя сцягі.
Дзмітрый Абельскі і Дзіна Эль-Дзіэфі Фейсал. Фота: тэлеграм-канал allians_belarus
Расследавальнікі пішуць, што Дзмітрыя з Дзінай вельмі часта можна пабачыць на гламурных тусоўках. А ў 2019 годзе журналісты сфатаграфавалі іх разам з Колем Лукашэнкам на матчы па пляжнаму футболу.
Дзмітрый Абельскі, Дзіна Эль-Дыефі Фейсал і Мікалай Лукашэнка на матчы па пяжнаму футболу. 2019 год. Фота: тэлеграм-канал allians_belarus
Такім чынам, Ірына Абельская наведала Зімбабвэ, дзе яе называлі «першай лэдзі Беларусі», разам з сваёй магчымай будучай нявесткай.
Чытайце яшчэ:
Ірына Абельская прывезла ў Зімбабвэ падарункі «ад Лукашэнкі»