Ekskluziŭnaje interviju Viarchoŭnaha pradstaŭnika Eŭrapiejskaha Źviazu pa zamiežnaj palitycy i biaśpiecy Chaŭjera Salany.
— Sp.Salana, ci zakranałasia biełaruskaja tema na samicie EZ—Rasieja ŭ Maskvie?
— Eŭrapiejski Źviaz vielmi zakłapočany sytuacyjaj u Biełarusi, jakaja nie pakazvaje adznak palapšeńnia. Naturalna, što my abmiarkoŭvajem sytuacyju, padzialajučy zakłapočanaść taksama z našymi partnerami ŭ rehijonie, uklučna z Rasiejaj.
Na samicie ŭ Maskvie 10 traŭnia EZ i Rasieja vykazali prychilnaść da supracoŭnictva, poruč ź inšymi pytańniami, u rašeńni prablem na asnovie aktualnych dla abodvuch bakoŭ kaštoŭnaściaŭ. U hetym rečyščy demakratyzacyja Biełarusi maje dla EZ vialikaje značeńnie, i jana budzie zastavacca ŭ paradku dnia jaho partnerstva z Maskvoj.
— Na pasiadžeńni Kamisii AAN pa pravach čałavieka i sustrečy ministraŭ zamiežnych spraŭ EZ u Luksemburhu prahučała žorstkaja krytyka ŭ adras «novaha susieda» Eŭraźviazu, jakim hod tamu stała Biełaruś. Jakoje vaša staŭleńnie da burnaj reakcyi na heta ŭ adras EZ z boku ministra zamiežnych spraŭ Biełarusi?
— Zakłapočanaść Eŭraźviazu sytuacyjaj u Biełarusi nie źjaŭlajecca niečym novym. Naša zaniepakojenaść vynikaje z abjektyŭnaha stanovišča spraŭ u krainie i maje ŭ svajoj asnovie ahulnyja eŭrapiejskija kaštoŭnaści demakratyi, pravoŭ čałavieka i viaršenstva zakonu. My budziem i nadalej vykazvać našu zakłapočanaść.
— Kali EZ źbirajecca adkryć u Miensku svaje pradstaŭnictva i infarmacyjny centar?
— Pytańnie pra adkryćcio pradstaŭnictva Delehacyi Eŭrapiejskaj kamisii [u Miensku] było vyłučana ŭ jakaści pryjarytetnaha, i ciapier detali prapracoŭvajucca Eŭrapiejskaj kamisijaj. Pakul ja nie mahu nazvać dakładnyja časavyja ramki.
— Nakolki mahčymaja ŭ najbližejšy čas Vaša sustreča z aficyjnym pradstaŭnikom vyšejšaha palityčnaha kiraŭnictva Biełarusi?
— Pry ciapierašnich abstavinach ja nie planuju sustrečy z palityčnym kiraŭnictvam Biełarusi.
— Jak viadoma, EZ raspracavaŭ novyja prahramy, u jakich praduhledžana i padtrymka raźvićcia hramadzianskaj supolnaści, niezaležnych ŚMI ŭ Biełarusi. Miarkujecca, što prahramy pačnuć pracavać z 2007 hodu. Adnak u Biełarusi ŭ 2005—2006 h. mohuć adbycca važnyja palityčnyja kampanii, paśla jakich i dapamahać nia budzie kamu. Ci ŭličvajuć u Bruseli takuju perspektyvu?
— Bajusia, što tut maje miesca peŭnaje niedastatkovaje razumieńnie. Eŭraźviaz užo padtrymlivaje biełaruskuju hramadzianskuju supolnaść. Novyja instrumenty dapamohi źjaviacca ŭ 2007 h. i zmohuć pašyryć vykarystańnie takoj dapamohi z boku ES. Adnak było b niasłušna śćviardžać, što Eŭraźviaz pakul nie prajaŭlaje aktyŭnaści ŭ hetaj sfery.
Ja ŭ poŭnaj miery painfarmavany nakont prezydenckich vybaraŭ 2006. Niadaŭna ja sustrakaŭsia ŭ Vilni ź liderami biełaruskaj hramadzianskaj supolnaści, i my abmiarkoŭvali majučyja adbycca vybary. Važna ŭśviedamlać, što EZ nia moža akazać aktyŭnuju padtrymku jakomu-niebudź kankretnamu kandydatu ci palityčnaj hrupoŭcy. My možam spryjać umacavańniu hramadzianskaj supolnaści, a taksama zabiaśpiečyć joj mahčymaści dla pieratvareńnia ŭ bolš dziejsnuju hramadzkuju siłu.
Eŭrapiejski Źviaz moža i budzie praciahvać akazvać padtrymku demakratyčnamu pracesu. Sutnaść i meta nazvanaha pracesu zaklučajucca ŭ tym, kab biełaruski narod abraŭ takoha kiraŭnika, jaki byŭ by realna padtrymany i vybrany bolšaściu.
— Dziakuj za adkazy.
Raman Jakaŭleŭski, mižnarodny partał «Wider Europe», www.w-europe.org
