U žychara vioski Patapaŭka Buda-Kašaloŭskaha rajona Homielskaj vobłaści znojdzieny arsienał rarytetnaj zbroi.
Jak paviedamili ŭ MUS Biełarusi, pry vobšuku znojdzieny paślavajenny aŭtamat Kałašnikava, kulamiot Harunova, abrez adnastvolnaj palaŭničaj hładkastvolnaj zbroi, štyk-nož da aŭtamata časoŭ Vialikaj Ajčynnaj vajny. Akramia taho, apieratyŭniki zabrali ŭ haspadara doma dva šprycy, niekalki butelek z ekstraktam ałkałoidu opiumu.
Svaju kalekcyju 46-hadovy raniej sudzimy viaskoviec chavaŭ u padvale ŭ bulbie, a štyk-nož — u siencach doma. Raniej mužčyna padzarablaŭ budaŭnikom u Rasii.Charakterna, što hod tamu na terytoryi susiedniaj krainy jon byŭ pryciahnuty da kryminalnaj adkaznaści za niezakonnyja dziejańni ŭ dačynieńni da ahniastrelnaj zbroi i bojeprypasaŭ.
"Pa źniešnim vyhladzie aŭtamata i kulamiota možna skazać, što jany nie zdolnyja zrabić streł (nazirajecca raśpiłoŭvańnie rulaŭ), — skazaŭ načalnik adździeła licenzijna-dazvolnaj pracy ŭpraŭleńnia prafiłaktyki MUS Andryjan Kachnovič. — Nie vyklučana, što rarytet moh być vykradzieny z muziejaŭ ci sa školnych vystaŭ pra vajnu. Heta viersija taksama adpracoŭvajecca. Adnak, pavodle słoŭ zatrymanaha, zbroju jon nabyŭ u znajomaha. Ciapier rarytety pieradadzieny na ekśpiertyzu, paśla zaklučeńnia jakoj budzie vyrašana pytańnie ab raspačynańni kryminalnaj spravy".
U adpaviednaści z art. 295 KK za niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ praduhledžana pakarańnie až da pazbaŭleńnia voli na siem hadoŭ. Dobraachvotnaja zdača zbroi i bojeprypasaŭ ad adkaznaści vyzvalaje.