Ministerstva transpartu i kamunikacyj Biełarusi ŭzmacniaje kantrol za arhanizacyjaj i vykanańniem pieravozak pasažyraŭ, u tym liku turystyčnych. Pra heta havorycca ŭ zajavie Mintransa, raźmieščanaj na jaho aficyjnym sajcie.
Zajava pryniataja paśla trahičnaha DTZ, jakoje adbyłosia ranicaj 11 lipienia ŭ Vałynskaj vobłaści Ukrainy — paciarpieŭ avaryju aŭtobus ź biełaruskimi dziećmi i darosłymi, jakija ich supravadžali, što nakiroŭvaŭsia ź Minska ŭ Bałharyju. U vyniku DTZ zahinuli vosiem čałaviek, u tym liku, pavodle papiaredniaj infarmacyi, adzin padletak — hramadzianin Biełarusi.
Mintrans źviartaje asablivuju ŭvahu kiraŭnikoŭ turystyčnych kampanij «na nieabchodnaść niaŭchilnaha vykanańnia norm «Praviłaŭ aŭtamabilnych pieravozak pasažyraŭ u Respublicy Biełaruś» (pastanova Savieta ministraŭ ad 30 červienia 2008 hoda № 972), asabliva raździeła 11 «Aŭtamabilnyja pieravozki hrup dziaciej aŭtobusami».
Jak zaznačajecca ŭ zajavie, u adpaviednaści z hetymi praviłami aŭtamabilnyja pieravozčyki abo zakazčyki takich pieravozak abaviazanyja paviedamić pra pieravozku hrup dziaciej, što maje adbycca, Dziaržaŭtainśpiekcyi, pravieści ŭ adpaviednych padraździaleńniach DAI instruktažy vadzicielaŭ pra asablivaści patrabavańniaŭ praviłaŭ darožnaha ruchu pry aŭtamabilnych pieravozkach hrup dziaciej, a taksama pra miery pieraściarohi, jakija harantavali b biaśpieku takich pieravozak pa maršrucie. U vypadku najaŭnaści ŭ transpartnym srodku vadziciela, jaki nie vałodaje ruskaj movaj, taki instruktaž pavinien pravodzicca z udziełam pierakładčyka.
Abaviazkovym źjaŭlajecca patrabavańnie praviadzieńnia techničnaha ahladu aŭtobusa, praduhledžanaha dla pieravozki hrup dziaciej u nierehularnych znosinach, u tym liku z zamiežnaj rehistracyjaj.Techahlad pavinien pravodzicca nie mienš jak za 7 dzion da pačatku pieravozki na dyjahnastyčnaj stancyi. Pry hetym u aŭtobusie, jaki ruchajecca pa maršrucie na adlehłaść bolšuju za 450 km, pavinna być dva vadzicieli, adpačynak jakich pierad pajezdkaj pavinien składać nie mienš za 12 hadzin.
Praviłami taksama nie dapuskajecca pieravozka hrup dziaciej z 23.00 da 5.00 hadzin, a taksama va ŭmovach niedastatkovaj bačnaści. Pieravozka hrup dziaciej u načny čas u paradku vyklučeńnia dapuskajecca pry nieabchodnaści dastaŭki dziaciej da čyhunačnaha vakzała, aeraporta ci da bližejšaha miesca načlehu.
Da pieravozak hrup dziaciej adnosiacca pieravozki dziaciej da 16 hadoŭ kolkaściu vosiem i bolš čałaviek.
