Były palitźniavoleny Vasil Parfiankoŭ znachodzicca ŭ lačebna-pracoŭnym prafiłaktoryi № 1 Śvietłahorska (Homielskaja vobłaść), paviedamlaje pravaabarončy sajt spring96.org.
Jak stała viadoma pravaabaroncam, Parfiankoŭ byŭ pieraviedzieny ŭ Śvietłahorsk ź minskaha Centra izalacyi pravaparušalnikaŭ (CIP) 21 vieraśnia. Vyśvietliłasia taksama, što rašeńnie nakiravać hramadskaha aktyvista ŭ ŁPP było pryniata sudom Pieršamajskaha rajona Minska 4 vieraśnia ŭ jaho adsutnaść.
Tym samym, adznačajuć pravaabaroncy, sud parušyŭ č. 4 art. 393–9 Hramadzianska-pracesualnaha kodeksa Biełarusi, dzie prapisana: «Zajava ab nakiravańni hramadzianina ŭ lačebna-pracoŭny prafiłaktoryj razhladajecca na praciahu 10 dzion z dnia jaho pastupleńnia ŭ sud z abaviazkovym udziełam pradstaŭnika orhana ŭnutranych spraŭ, prakurora, hramadzianina, zajava ab nakiravańni jakoha ŭ lačebna-pracoŭny prafiłaktoryj razhladajecca sudom». Častka 6 hetaha artykuła havoryć: «U vypadku ŭchileńnia hramadzianina, zajava ab nakiravańni jakoha ŭ lačebna-pracoŭny prafiłaktoryj razhladajecca sudom, ad jaŭki ŭ sud jon moža być pryviedzieny tudy».
Pravaabaroncam nieviadoma, ci było rašeńnie suda vydadziena na ruki Vasilu Parfiankovu. Ale terminy, u jakija jon moh abskardzić jaho u kasacyjnym paradku, užo prajšli. Akramia taho, samu praktyku prymusovaj izalacyi hramadzian u ŁPP pa-za kryminalnym pieraśledam pravaabaroncy razhladajuć jak parušeńnie pravoŭ čałavieka.
Fihuranty kryminalnaj spravy ab masavych biesparadkach 19 śniežnia 2010 hoda ŭ Minsku Vasil Parfiankoŭ i Uładzimir Jaromienak byli asudžanyja 16 vieraśnia na 5 sutak aryštu za parušeńnie praviłaŭ previentyŭnaha nahladu (art. 24.12 Kodeksa ab administracyjnych pravaparušeńniach) i źmieščany ŭ CIP.
Abodva pavinny byli vyzvalicca 21 vieraśnia, adnak vyjšaŭ ź CIP tolki Jaromienak. Tady ž źjavilisia čutki ab nakiravańni Parfiankova ŭ adzin z ŁPP.
Treba adznačyć, što Parfiankoŭ i Jaromienak na hety momant znachodziacca jašče i pad kryminalnym pieraśledam — taksama za parušeńnie praviłaŭ previentyŭnaha nahladu (art. 421 KK). Pa hetym artykule Jaromienak byŭ asudžany 20 žniŭnia na 3 miesiacy aryštu. Data suda nad Parfiankovym pakul nieviadomaja.
U 2011 hodzie Parfiankoŭ i Jaromienak byli asudžanyja ŭ ramkach kryminalnaj spravy ab masavych biesparadkach. Jaromienku pryhavaryli da 3 hadoŭ źniavoleńnia ŭ kałonii ŭzmocnienaha režymu, Parfiankova — da 4 hadoŭ pazbaŭleńnia voli ŭ kałonii strohaha režymu. U žniŭni 2011 hoda abodva vyjšli na volu na padstavie ŭkaza prezidenta ab pamiłavańni.
Pravaabaroncy pryznali Parfiankova i Jaromienku palityčnymi źniavolenymi. Ciapierašni pieraśled byłych palitźniavolenych pravaabaroncy razhladajuć jak pomstu i sprobu cisku na ich z boku ŭład.
