Padziei ŭ susiedniaj Ukrainie nie pakinuli abyjakavymi i biełaruskich muzykaŭ. Lavon Volski, Aleh Chamienka, Źmicier Vajciuškievič, Vinsent, hurty Sciana i Akute vykazali svaje mierkavańni i słovy padtrymki ŭkrainskamu narodu.
Lavon Volski maje bahata siabroŭ va Ukrainie, sam kaliści vystupaŭ na Majdanie ŭ čas Aranžavaj revalucyi pierad paŭmiljonam hledačoŭ. Pra apošnija naviny ź Jeŭramajdana jon daznajecca niepasredna praz svajho kalehu — lidara hurtu «Tartak» Alaksandra Pałažynskaha, jaki biare aktyŭny ŭdzieł u kijeŭskich padziejach.
«Jašče ŭ pieršy dzień Jeŭramajdana ja źviazaŭsia z Saškom Pałažynskim — pytaŭsia, čym dapamahčy. Jon adkazaŭ, što kali budzie treba, paviedamić. Paćviardžaju — kali treba, my hatovyja. Ukrainskija braty i siostry! Žadaju vam chutkaj Pieramohi, a paśla — nie rasčaravacca ŭ joj. Budźcie pilnyja — nie dajcie siabie zabłytać, spravakavać i ašukać! A ŭvohule, vydatna, što paboč z nami jość Susied, hodny i nieabyjakavy da svajho losu. Słava Ukrainie!» — zajaviŭ muzyka.
Vykanaŭca Vinsent jakraz naviedvaŭ Ukrainu za niekalki dzion da Jeŭramajdana, tamu dobra adčuvaje nastroj tamtejšaj moładzi: «Ja šmat razmaŭlaŭ z maładymi ŭkrainskimi tvorcami pra ichniuju ŭnutranuju situacyju, jany, u svaju čarhu, ažyŭlena cikavilisia našaj situacyjaj. Ja pabačyŭ, što prahresiŭnaja ukrainskaja moładź abiraje jeŭrapiejski šlach raźvićcia. Ja vykazvaju svaje słovy padtrymki ŭkraincam, jakija prahnuć lepšaha zaŭtra. Upeŭnieny, što my majem ahulny histaryčny jeŭrapiejski šlach i jeŭrapiejskuju budučyniu».
Słovy padtrymki ŭkraincam vykazvaje i lider hurta «Pałac» Aleh Chamienka, jaki napisaŭ u svaim statusie ŭ Facebook: «Trimajtiesia brati». «Ja adčuŭ poŭnuju razhublenaść, kali ŭ navinach pa rasijskim TV skazali, što Janukovič pahavaryŭ z «adnym samych upłyvovych ludziej u śviecie» dy źmianiŭ svajo rašeńnie nakont jeŭraintehracyi. Na maju dumku, hetym samym, byli spravakavanyja tyja padziei, jakija potym razharnulisia va Ukrainie… Ciapier virujuć nadzvyčajnyja emocyi, heta vymahaje zrabić niepradumanyja dziejańni. Chaču pažadać ukraincam być mudrymi. Słava Ukrainie!»
Hurt Akute, tvorčaść jakoha lubiać i šanujuć va Ukrainie i zaprašajuć u jakaści haściej na takija festy, jak «Banderštat» i «Viercifest», zajavili, što całkam padtrymlivajuć imknieńni ŭkraincaŭ: «My vitajem hetyja padziei i ščyra zyčym kab u našych susiedziaŭ usio atrymałasia. Słava Ukrainie!»
Nie zastaŭsia ŭ baku ad padziejaŭ i muzyka Źmicier Vajciuškievič. «Vielmi tryvožna za našych susiedziaŭ. Maju spadzieŭ, što imknieńni prostych ludziej spraŭdziacca i Ŭkraina znojdzie svaju jeŭrapiejskuju budučyniu. Ciapier hałoŭny strach u tym, što moža zdarycca abłom ludzkich nadziejaŭ. Ščyra žadaju, kab ukraincy pajšli svaim šlacham, zajmieli nadziejnuju budučyniu, a nie bieznajdziejnuju, jak taho prahnuć niekatoryja».
U hetyja dni ŭ sacyjalnych sietkach sapraŭdym hitom stała pieśnia hurta Sciana «Biełaruś — Ukrajina», jakuju bieraściejskija muzyki vykanali ŭ duecie z svaimi kalehami z Chiersona — hurtom «Rolliks».
«Vielmi tryvožna nam ciapier nazirać za padziejami va Ŭkrainie. Bo našym bratam chočuć naviazać čužy vybar. Adnak my vierym, što jany zmohuć adstajać svaju volu. Trymajciesia!» — kaža aŭtar słovaŭ da hetaj pieśni Andruś Klimus.
