Z kvatery zabrali noŭtbuki, dyski, bitu, a taksama ŭlotki, haziety i nalepki niezarehistravanaj partyi BCHD.
Praź dzień paśla bojki biełarusaŭ z turkmienami, jakaja adbyłasia 13 śniežnia ŭ Baranavičach, aktyvista niezarehistravanaj palityčnaj partyi Biełaruskaja Chryścijanskaja Demakratyja Arcioma Babieja milicyja zatrymała dla vyśviatleńnia asoby.
A 18 śniežnia, prykładna ŭ 20.45, u jaho kvatery praviali pieratrus, piša Intex-press.
Sam Arciom, jakomu 21 hod, nie žyvie pa miescy prapiski, tamu «haściej» z pravaachoŭnych orhanaŭ sustrakali jaho starejšy brat i mama.
«Dvoje ludziej u formie pakazali mnie papieru, padpisanuju čałaviekam sa Śledčaha kamiteta, u jakoj było napisana, što niejki chłopiec z hrupaj nieviadomych asobaŭ 13 śniežnia na płoščy Lenina čaplaŭsia da asob niebiełaruskaj nacyjanalnaści i pradprymaŭ suprać ich chulihanskija dziejańni.
I kab znajści materyjały i rečy, jakija dapamohuć znajści nieviadomych, u kvatery Arcioma dazvolena pravieści pieratrus. Nam nie dazvolili zrabić kopiju hetaj papiery, tamu kažu vam pa pamiaci.
A jak źviazany z toj bojkaj moj Arciom, mnie nie rastłumačyli», — raskazała Iryna Karnickaja, mama Arcioma.
Iryna adznačyła, što «ludziej u formie bolš cikavili papiery Arcioma, čym rečavyja dokazy jaho dačynieńnia da bojki».
«Jany pierahortvali staryja padručniki, razhladali kanvierty, u jakich Arciomu prychodziać haziety i listy z arhkamiteta BCHD. Vielmi ich zacikavili nalepki z hierbam «Pahonia», ich kanfiskavali. Zabrali i ŭlotki, pryśviečanyja akcyjam BCHD.
Pytaju ich, jakim čynam ulotki «Moładź suprać spajsa» i «My — za siamiejnyja kaštoŭnaści» mohuć być źviazanyja z bojkaj z zamiežnikami? My, kažuć, tolki vykonvajem daručeńni, — raskazała Iryna Karnickaja.
Praź dźvie hadziny pieratrus skončyli, z kvatery byli kanfiskavanyja dva noŭtbuki (Iryny i brata Arcioma), 45 dyskaŭ, fłeški, płakaty, pryviezienyja Arciomam ź Litvy, haziety, jakija vydajucca arhkamitetam BCHD, ulotki, nalepki, a taksama bita, jakuju znajšli na bałkonie.
«Ščyra kažučy, hetaj bitaj chiba što tolki bulbu taŭčy, ale heta dla ich, napeŭna, važny dokaz», — miarkuje Iryna.
Pa słovach samoha Arcioma, viečaram 13 śniežnia jon da 8 hadzin viečara znachodziŭsia ŭ haściach u vychavalnicy dziciačaha sada, dzie jon pracuje.
Paźniej pajechaŭ da babuli. Pa słovach Arcioma, abiedźvie žančyny zmohuć paćvierdzić jaho alibi. U dzień svajho zatrymańnia, raspavioŭ Arciom, jon prahulvaŭsia ź siabram u vajennym haradku. I jaho, i tavaryša zatrymali i adpuścili praz 2,5 hadziny.
U hety ž dzień milicyja nie adnojčy zatrymlivała dla vyśviatleńnia asoby padletkaŭ.
«Pra bojku z hramadzianami z Turkmienistana ja viedaju roŭna stolki, kolki viedajuć inšyja haradžanie sa ŚMI i «UKantakcie». Nijakich pretenzij da turkmienaŭ ja nie maju.
Mnie zdajecca, što milicyi ja chutčej cikavy jak člen arhkamiteta niezarehistravanaj palityčnaj partyi, čym jak čałaviek, jaki moža bicca z zamiežnikami.
«IP» pakul nie ŭdałosia datelefanavacca ŭ Baranavicki mižrajonny adździeł Śledčaha kamiteta, kab daviedacca kolki jašče pieratrusaŭ było praviedziena pa hetaj spravie.
