Kali mnie ŭ kancy minułaha tydnia patelefanavali z Administracyi prezidenta i zaprasili na budučuju pres-kanfierencyju ź viadučymi biełaruskimi miedyjami, ja choć i nie čakaŭ, ale nie mocna ździviŭsia.
Pryjemna, što naša ŭłada narešcie pryznała isnavańnie miedyjaŭ u bajnecie. Ździviŭsia tolki, čamu abrali mianie, a nie hałoŭnaha redaktara. Tym bolš što ja navat nie žurnalist. Adnak mnie patłumačyli, što zaprašajuć tolki pieršych asob.
U 9.50 ja byŭ na prachadnoj novaha Pałaca Niezaležnaści z boku vuł. Arłoŭskaj. Va ŭsich udzielnikaŭ adabrali ŭsie srodki suviazi, hukazapisu i fotakamiery, patłumačyŭšy, što farmat sustrečy — nie pres-kanfierencyja, a žyvyja znosiny. Za adnym vyklučeńniem: BiełTA viała videazapis i rychtavała natatki pa chodzie sustrečy. Jašče ŭ zale było niekalki kamier.
Pa farmacie impreza ŭsio ž akazałasia padobnaj na pres-kanfierencyju, pakolki prezident nie zadavaŭ ŭdzielnikam pytańniaŭ, a tolki adkazvaŭ.
Pałac
Pałac Niezaležnaści ŭnutry akazaŭsia ŭnušalnym, azdoblenym salidnym kamieniem, miescami reljefna ŭpryhožanym pad biełaruskuju vyšyŭku: jak na ściahu, tolki ŭ kolery naturalnaha kamienia. Lustry na vyhlad z češskaha kryštalu. Viestybiul padobny adnačasova na choł Pałaca Respubliki, a afarmleńnie — na Prezident-Hatel. Tualet — na ŭzroŭni dobrych restaranaŭ: z aŭtamatykaj, razavymi machrystymi ručnikami dla vycirańnia ruk i adnarazovym siadzieńniami. Raduje, što choć dzieści ŭ dziaržaŭnych ustanovach jość dobryja prybiralni. A to ŭ mnohich salidnych dziaržaŭnych ustanovach prybiralni da hetaha času možna znajści pa pachu.
U 10.40 nas pravodzili na druhi pavierch u absalutna kruhłuju zału biez voknaŭ, što nahadvała anałahičnuju zału ŭ Nacyjanalnaj biblijatecy. U centry zały stajaŭ pastamient, pakryty dyvanom ź biełych kvietak, što vyklikała ŭ šerahu prysutnych asacyjacyju z pachavańniem. Vakoł pastamienta — vializny kruhły stoł pa ŭsim pierymietry zały. Kožny zaniaŭ miesca pierad tabličkaj sa svaim proźviščam. Na stale lažaŭ stos papiery z pazałočanym ciśnieńniem «Pałac Niezaležnaści Respubliki Biełaruś» i zialonaja ručka z nadpisam «Biełaruś».
Pierad kožnym stajała vazačka ź biełaruskim piečyvam «hrybočki». Udzielnikam biez tablički akazaŭsia namieśnik kiraŭnika Administracyi prezidenta Alaksandr Radźkoŭ, jaki sieŭ sa mnoj pobač.
Sustreča
Roŭna ŭ adzinaccać uvajšoŭ prezident. Uśmichajučysia, jon pavitaŭsia z kožnym za ruku i zaniaŭ svajo miesca biez tablički, zatoje adrazu ź dźviuma dziaržaŭnymi ściahami za śpinaj. Byvajuć ludzi, jakija ŭ natury vyhladajuć inakš, čym na fota ci videa, ale prezident vyhladaŭ hetak ža, jakim my jaho pryvykli bačyć pa televizary. Sustreča pačałasia.
Na praciahu piaci hadzin nas dvojčy paili haračymi napojami. Adzin raz mnie dastaŭsia čaj, druhi - kava. Davodzicca z sumam zhadać, što vadkaść ź ciažkaściu pakryvała dno i vypivałasia za adzin hłytok. Tady heta vyhladała skvapnaściu arhanizataraŭ. Ciapier ža ŭpeŭnieny, što jany takim čynam pakłapacilisia ab mačavych puchirach udzielnikaŭ, bo, paŭtaraju, sustreča doŭžyłasia bolš za piać hadzin bieź pierapynku.
Sami pazałočanyja kubki i spodki akazalisia nievialikimi. Naniesienyja na załatoj ablamoŭcy fabryčnym sposabam hierby Biełarusi vydavali zakaznoje pachodžańnie sierviza. Ci była heta posud z taho samaha impartnaj pazałočanaha naboru, jaki staŭ pradmietam niadaŭniaha publičnaha abmierkavańnia i adkrytaj zajzdraści mnohich suajčyńnikaŭ, skazać nie biarusia. Ja ŭvohule nie razumieju taho prypadku zajzdraści: cikava, a z čaho treba paić i karmić prezidentaŭ? Asabliva ŭschodnich dziaržaŭ. Chiba my z vami kormim i poim darahich haściej z tannaha posudu?
Znosiny
Pierakazvać źmiest sustrečy biessensoŭna, bo na momant vychadu maich miemuaraŭ jon trapić va ŭsie miedyi. Usie pytajucca, jakija ŭražańni. Dobryja. Prezident kožnaha vysłuchaŭ i kožnamu adkazvaŭ doŭha i raźmierana, pa 10-15 chvilin i bolš. Padčas adkazaŭ jon šmatkroć zhadvaŭ proźviščy prysutnych, u tym liku i majo. Tak by mović, piersanalizacyja. Była mahčymaść zadać bolš za adno pytańnie abo paprasić dać razhornuty adkaz. Ja joju z pryčyny poźniaha času i niežadańnia zatrymlivać inšych nie skarystaŭsia, pra što ciapier škaduju.
Majo pytańnie było nastupnym: «Alaksandr Ryhoravič, jakoj budzie Biełaruś praz 30 hadoŭ?
Toje, što mocnaj i kvitniejučaj, — heta i tak jasna. Pa kurs valuty ŭ toj čas — heta da varažbitki (usie zaśmiajalisia, uklučajučy prezidenta). A kudy lidar nacyi viadzie nacyju? Vašaje bačańnie budučyni dla Biełarusi?»
Adkaz byŭ hranična karotkim: «Biełaruś budzie niezaležnaj dziaržavaj». I ŭsio.
Mabyć, heta byŭ samy łakaničny adkaz za ŭsiu sustreču. Paradavała, adnak, što ŭsio ž taki prezident źbirajecca prytrymlivacca kursu na niezaležnaść.
«Biełaruś budzie suvierennaj i niezaležnaj dziaržavaj. Heta maja adzinaja, hałoŭnaja zadača, jakuju ja pavinien vykanać», — pryvodzić adkaz na majo pytańnie ahienctva BiełTA, jakoje mieła mahčymaść vieści stenahramu pres-kanfierencyi.
«Ja da 2030 hoda, mabyć, nie dažyvu jak prezident. Chtości budzie paśla mianie, ale ja ŭpeŭnieny, vy jaho prymusicie hetak ža dumać i da hetaha imknucca, kab Biełaruś była dziaržavaj i naš narod nikoli nie byŭ pad čužym bizunom», — adznačyŭ Alaksandr Łukašenka. «Usio astatniaje my kupim», — dadaŭ jon.
Što ja chacieŭ pačuć u adkaz
Ščyra kažučy, ja rasčaravany, bo raźličvaŭ na razhornuty adkaz.
Chaciełasia pačuć pra toje, praz 30 hadoŭ:
Budzie naša kraina pramysłovaj abo ahrarnaj?
Ci zastaniecca bujnaja pramysłovaść u rukach dziaržavy?
Ci źjavicca pryvatnaja ŭłasnaść na ziamlu?
Što budzie z MTZ, MAZam, BiełAZam?
Jakoje miesca ŭ ekanomicy zojmuć infarmacyjnyja technałohii?
Dzie buduć najbujniejšyja handlovyja partniory Biełarusi?
Ci vykładuć uradavyja dadzienyja ŭ internet?
Ci zmohuć biełarusy jeździć pa śviecie bieź viz?
Ci źniknie Biełaruś z «čornych śpisaŭ» usich vidaŭ? Ci praciahnie ŭłada abyjakava nazirać za tym, jak našaj krainaj pałochajuć śviet?
Ci budzie strachavaja miedycyna?
Ci trapiać imiony biełaruskich navukoŭcaŭ i vynachodnikaŭ u zachodnija padručniki (jak Edysan, Archimied abo Pareta)?
Ci ŭvojdzie BDU ŭ rejtynh 100 najlepšych univiersitetaŭ śvietu?
Što ž, kali-niebudź žyćcio daść adkazy na hetyja pytańni.
