Arhanizacyja darožnaha ruchu źmianiłasia na niekatorych skryžavańniach u centralnaj častcy Minska, paviedamiła kiraŭnik pres-słužby staličnaj DAI Taćciana Charlinskaja.
Samyja značnyja źmianieńni zakranuć skryžavańnie praśpiektaŭ Mašerava i Pieramožcaŭ. Rearhanizacyja darožnaha ruchu tut zapłanavana ŭ dva etapy. Da hetaha momantu pieršaja častka rabot vykanana: u pryvatnaści, zabaronieny levy pavarot pa praśpiekcie Mašerava z boku vulicy Daŭmana na praśpiekt Pieramožcaŭ. Kab u vadzicielaŭ, jakija raniej karystalisia hetym pavarotam, była alternatyva, źmieniena arhanizacyja darožnaha ruchu na skryžavańni praśpiekta Mašerava i vulicy Zasłaŭskaj. Tam ustanoŭlena dadatkovaja siekcyja śviatłafora naleva z praśpiekta Mašerava na vulicu Zasłaŭskuju z boku praśpiekta Pieramožcaŭ.
Druhi etap źmianieńnia schiemy ruchu na skryžavańni praśpiektaŭ Pieramožcaŭ i Mašerava płanujecca realizavać da lipienia. Budzie zabaronieny levy pavarot z praśpiekta Pieramožcaŭ na praśpiekt Mašerava, kali jechać z boku vulicy Mielnikajte.
Z ulikam hetaha budzie skarekciravana rabota śviatłaforaŭ na skryžavańni praśpiekta Pieramožcaŭ i vulicy Mielnikajte, a taksama na skryžavańni vulic Mielnikajte i Zasłaŭskaja.
Akramia taho, užo źmieniena arhanizacyja ruchu na skryžavańni praśpiekta Mašerava i vulicy Daŭmana. U pryvatnaści, pavialičana kolkaść pałos dla ruchu pa praśpiekcie Mašerava z boku praśpiekta Pieramožcaŭ, a taksama pa vulicy Daŭmana z boku vulicy Arłoŭskaj. Usiaho dabaviłasia pa adnoj pałasie.
Taksama źmianiłasia schiema ruchu na skryžavańni praśpiekta Mašerava i vulicy Krapotkina. Na praśpiekcie Mašerava z boku praśpiekta Pieramožcaŭ vydzielena pałasa dla levabakovaha ruchu na vulicu Krapotkina.
Pavodle słoŭ Taćciany Charlinskaj, źmianieńni zrobiać ruch pa hetych skryžavańniach bolš kamfortnym, što razhruzić intensiŭnaść aŭtamabilnaha patoku. «Heta robicca dla samich vadzicielaŭ, kab sekanomić ich čas, razhruzić darohi, paźbiehnuć značnych zatoraŭ», - padkreśliła jana.
