Zrazumieła, jechać da daktaroŭ ź niejkaj łuchtoj u śviata mała chto choča. I ŭ toj ža čas jość momanty, kali pračakać «da paniadziełka» značyć zamiest niekalkich dzion prachvareć niekalki miesiacaŭ. Jakija ž chvaroby patrabujuć adarvacca ad śviatočnaha stała i jechać u lakarniu?
Vostry bol na toje i vostry, kab čałaviek kinuŭ usio i bieh pa dapamohu. Kali z «vostrym žyvatom» ludzi zvyčajna nie žartujuć, to zubny bol tryvajuć da apošniaha: a raptam samo projdzie? I lečacca «narodnymi srodkami». A ŭ toj ža čas chvaroby zuboŭ – reč sapraŭdy niebiaśpiečnaja. Kali zub balić nie pieršy dzień, čakajcie, što na śviata jon nahadaje pra siabie. Ubačyli, što tvar prypuch, staŭ kiepska adkryvacca rot, baluča hłytać? Nie sprabujcie lačycca narodnymi srodkami: jedźcie ŭ lakarniu. Nie chodzić transpart albo nie viedajecie, kudy jechać? Vyklikajcie «chutkuju dapamohu», vas zaviazuć.
Traŭmy taksama nie lubiać čakańnia. Śviežaja rana, nie zašytaja napraciahu niekalkich hadzin, robicca hnojnaj. I sproby ŭ chacie zamazać jodam ci zalić pierakisam vadaroda nie harantujuć pośpiechu. Pierałomy – asabliva adkrytyja pierałomy (vy viedajecie, što pierałomy skivic – heta adkrytyja pierałomy, navat kali vy nie bačycie vonkavych paškodžańniaŭ?) – za dzień-dva mohuć uskładnicca asteamijelitam, lačyć abvastreńni jakoha vy budziecie štovosień da kanca žyćcia. Tamu atrymali ŭ tvar ci niaŭdała paśliznulisia – razvaročvajemsia i jedziem u lakarniu.
Nie varta čakać značnaha paharšeńnia, kali vy – chraničny chvory i adčuli abvastreńnie chvaroby.
Šmat chto z pacyjentaŭ tłumačyć poźni zvarot da doktara tym, što pjany nie chacieŭ jechać. Pakinuŭšy za kadram lekcyju pra škodu ałkaholu, spynimsia na hałoŭnych momantach.
Ałkahol maskiruje simptomy. Vam nie tak užo i balić, a spravy dreń. Udarylisia hałavoj? U pjanaha aciok mozha kampiensujecca mačahonnym efiektam śpirta. Kali traŭma mozha surjoznaja, pa praćvierazieńni čałaviek, nie pračynajučysia, upadaje ŭ komu, a vy dumajecie – śpić sakolik.
Ałkahol nie daje dobra padziejničać zamarozcy – tak, ale chto vam skazaŭ, što z pachmiella zamarozka dobra biarecca? A voś hnojnyja ŭskładnieńni nie dajuć całkam abiazbolić ani pjanaha, ani ćviarozaha.
Ałkaholnaje apjanieńnie paznačajuć u daviedcy i ŭ historyi chvaroby (a potym – u balničnym listku). Vy suprać? A što doktaru rabić? Ałkahol mocna ŭpłyvaje na lačeńnie, na simptomy, na pavodziny čałavieka. I pry razbory sprečnych vypadkaŭ poŭny dyjahnaz abaraniaje lekara. Tamu lepš viedać mieru i nie pačynać «śviatkavać», kali pačuvajeciesia nie lepšym čynam.
Dziažurnyja daktary na pracy nie śviatkujuć (vyklučeńni byvajuć, ale heta zusim nie toje, što 15-20 hod tamu, kali praćviataŭ słohan «Pjanomu chvoramu – pjany lekar»). Nie škadujcie dziažurnaha doktara: paškadujcie siabie. Doktar vyhladu nie pakaža, što rady vas bačyć u śviata. Daktary, naohuł, lubiać zdarovych. Ale svaječasovuju pieršuju dapamohu vy budziecie mieć. A tyja, chto dačakajucca «paniadziełka», aproč paharšeńnia zdaroŭja i čarhi na paŭdnia atrymajuć biaspłatny kurs lekcyj na temu «A dzie ž vy siadzieli tak doŭha i čamu b vam tam dalej nie siadzieć».
Kudy ž biehčy pa dapamohu ŭ śviatočnuju noč? Žycharam stalicy lepiej nabrać 103 albo pazvanić ŭ adździeł špitalizacyi. Nie ryzykujcie jechać naŭhad tudy, dzie lačylisia 10 hod tamu – lakarni pieraprafilujuca, adździaleńni pierajazdžajuć ci začyniajucca.
Minzdraŭ abiacaje, što ŭ kaladny pieryjad miedustanovy pracujuć nastupnym čynam:
Lakarni (stacyjanary)
20 śniežnia 2014 h. — pavodle hrafika subotniaha dnia;
25 śniežnia 2014 h. — śviatočny dzień;
26 śniežnia 2014 h. — pracoŭny dzień;
1 studzienia 2015 h. — śviatočny dzień;
2 studzienia 2015 h. — pracoŭny dzień;
7 studzienia 2015 h. — śviatočny dzień;
10 studzienia 2015 h. — pavodle hrafika subotniaha dnia.
Palikliniki, ambułatoryi, sanitarna-epidemičnyja ŭstanovy, apteki, miedtechniki, stancyi pieralivańnia kryvi i h.d.
20 śniežnia 2014 h. — pracoŭny dzień;
25 śniežnia 2014 h. — śviatočny dzień;
26 śniežnia 2014 h. — pavodle hrafika subotniaha dnia;
1 studzienia 2015 h. — śviatočny dzień;
2 studzienia 2015 h. — pavodle hrafika subotniaha dnia;
7 studzienia 2015 h. — śviatočny dzień;
10 studzienia 2015 h. — pracoŭny dzień.
Varta mieć na ŭvazie: stacyjanary akazvajuć nieadkładnuju dapamohu kruhłasutkava, niezaležna ad vychodnych i śviataŭ. U dni čakanaha pavialičeńnia pastupleńniaŭ – dziaržaŭnyja śviaty i h.d. – dziažurnyja bryhady chirurhaŭ bujnych ekstranych stacyjanaraŭ uzmacniajucca dadatkova.
Uračy adździaleńnia ŭ śviatočnyja i vychodnyja dni pieradaručajuć viadzieńnie chvorych dziažurnym daktaram. U śviatočnyja i vychodnyja dni, a taksama na noč, abaviazkova pryznačajecca dziažurny administratar (adkazny pa lakarni), ź jakim vyrašajucca sprečnyja pytańni jak miedyčnaha, tak i administracyjnaha płana.
A voś atrymać kansultacyju śpiecyjalistaŭ kafiedry miedyčnaha ŭniviersiteta albo akademii paśladypłomnaj adukacyi, jakija pracujuć u stacyjanarach, vy možacie ŭ adpaviednaści z hrafikam pracy ŭstanoŭ adukacyi – pry pieranosie pracoŭnych dzion hrafik pracy lekaraŭ adździaleńnia i kafiedry časta nie supadaje.
U paliklinikach daktary pracujuć pa subotach pryblizna 1 raz na miesiac, to bok i ŭ subotu vam moža pašancavać trapić da vuzkaha śpiecyjalista.
