Asambleja niaŭradavych demakratyčnych arhanizacyj (NDA) nazvała łaŭreataŭ šostaj premii «Čempijony hramadzianskaj supolnaści». Cyrymonija ŭznaharodžańnia adbyłasia ŭviečary 13 studzienia ŭ Minsku.
Premijaj «Čempijony hramadzianskaj supolnaści» ŭhanaroŭvajucca vybitnyja asoby, arhanizacyi, a taksama adznačajucca padziei, jakija byli znakavymi dla raźvićcia treciaha siektara Biełarusi letaś. Jany vyznačajucca pavodle hałasavańnia 44 členaŭ rabočaj hrupy Asamblei NDA ź liku pradstaŭnikoŭ roznych arhanizacyj, a taksama 56 admysłova zaprošanych ekśpiertaŭ ź lidaraŭ NDA, žurnalistaŭ, što pišuć pra treci siektar, dy papiarednich pieramožcaŭ premii.
Zvańniem «Hramadski lidar hoda» ŭhanaravany niekalki dziasiatkaŭ viadučych šmatlikich moŭnych kursaŭ, jakija stała pracavali albo ź`iavilisia letaś. Tak, ad imia kamand moŭnych kursaŭ sa słovami padziaki vystupili Alaksiej Šein («Movavieda»), Valaryna Kustava («Mova ci kava») i Alena Šaramiet («Mova TUT»). Arhanizataram kursaŭ «Mova nanova» hanarovy dypłom i statuetka byli ŭručany napiaredadni.
U naminacyi «Kampanija hoda» pieramahła kamanda «Art Siadziby» za hramadskuju kampaniju «Paznač siabie biełarusam», jakaja startavała 6 śniežnia minułaha hoda. Padčas pieršaj akcyi hetaj kampanii kala sotni vałancioraŭ razdali ŭ Minsku 5 km stužki z nacyjanalnym arnamientam. Aproč taho, žury adznačyła ŭniosak kamandy ŭ spravu papularyzacyi biełaruskich simvałaŭ z dapamohaj «vyšymajek» — majek ź biełaruskim arnamientam.
Pieramožcam u naminacyi «Novaja inicyjatyva» stała hramadskaja inicyjatyva «Ekśpierty ŭ abaronu Kurapataŭ», u jakuju ŭvachodziać archieołahi, architektary, inžyniery, jurysty, kulturołahi, žurnalisty. Letaś siabry inicyjatyvy ŭ sudovym paradku aktyŭna zajmalisia jurydyčnaj abaronaj achoŭnych miežaŭ miesca rasstrełaŭ palityčnych achviaraŭ va ŭročyščy Kurapaty ad niezakonnaha skaračeńnia i zabudovy.
Najbolš admietnaj rehijanalnaj padziejaj minułaha hoda, pa viersii Asamblei NDA, stała adznačeńnie ŭ kastryčniku minułaha hoda ŭ Śvisłačy (Hrodzienskaja vobłaść) 20-ha Dnia pamiaci ŭdzielnikaŭ paŭstańnia 1863 hoda.
Niebyvałaja akcyja salidarnaści biełaruskich futbolnych zaŭziataraŭ na matčy pamiž Biełaruśsiu i Ukrainaj 9 kastryčnika na «Barysaŭ-Arenie», jakaja skončyłasia masavym zatrymańniem fanataŭ, atrymała hanarovaje zvańnie «Kreatyvu hoda». Na cyrymonii ŭručeńnia ŭznaharod hości imprezy prasłuchali aŭdyjapadziaku adnaho z zaŭziataraŭ, jaki zachacieŭ zastacca nienazvanym. U svaim zvarocie jon abvierh toje, što ŭ akcyi byŭ palityčny padtekst, zajaviŭšy, što zaŭziatary prosta padtrymlivali svaje kamandy.
Uznaharodu «Harbuz hoda», jakaja ŭručajecca za niehatyŭnyja dziejańni ŭ dačynieńni da arhanizacyj hramadzianskaj supolnaści i ich pradstaŭnikoŭ, sioleta atrymali ŭpraŭleńnie pa hramadzianstvu i mihracyi HUUS Minharvykankama i adździeł pa hramadzianstvu i mihracyi Pieršamajskaha RUUS Minska, jakija pryčynilisia da anulavańnia vidu na žycharstva pravaabaroncy Aleny Tankačovaj.
Žurnalist haziety «Novy čas» Marat Haravy staŭ lepšym u naminacyi «Žurnalist ci miedyja hoda» za «najbolš hruntoŭnaje i roznabakovaje aśviatleńnie hramadskaj dziejnaści ŭ ŚMI».
Najlepšym sajtam NDA, pa viersii arhanizataraŭ premii, sioleta staŭ infarmacyjna-mietadyčny partał dla nastaŭnikaŭ nastaunik.info.
