Sudovaja kalehija pa kryminalnych spravach Bresckaha abłasnoha suda 9 krasavika vyniesła pryhavor 25-hadovamu niepracujučamu žycharu Kobrynskaha rajona, jaki zhvałtavaŭ i zabiŭ dziaŭčynu.
Jak paviedamiŭ prakuror adździeła prakuratury Bresckaj vobłaści Michaił Klaŭcevič, jaki padtrymlivaŭ dziaržaŭnaje abvinavačvańnie pa spravie, u noč z 13 na 14 žniŭnia 2014 hoda ŭ Kobrynskim rajonie mužčyna ŭ stanie ałkaholnaha apjanieńnia jechaŭ na vykradzienym im aŭtamabili. Niedaloka ad vioski Andronava ŭbačyŭ dziaŭčynu. Jana išła z Andronava, dzie była ŭ haściach ŭ stryječnaj siastry, u susiedniuju viosku.
Mužčyna prapanavaŭ padvieźci 18-hadovuju dziaŭčynu dadomu. Ale zamiest hetaha advioz jaje ŭ lasny masiŭ niedaloka ad vioski Batčy, dzie zhvałtavaŭ i zadušyŭ. Kab schavać ślady złačynstva, abvinavačvany na miescy zabojstva vykapaŭ jamu i zakapaŭ trup svajoj achviary, jaje adzieńnie spaliŭ. Paśla čaho pajechaŭ.
Ź dziaŭčynaj jon znajomy nie byŭ.
18 žniŭnia mužčynu zatrymali pa padazreńni va ŭčynieńni kradziažu. U dalejšym była ŭstanoŭlena jaho zamiešanaść u zhvałtavańni i zabojstvie. Paźniej jon ukazaŭ miesca, dzie zakapaŭ trup.
Jak zaznačyŭ Klaŭcevič, hety hramadzianin taksama abvinavačvaŭsia va ŭčynieńni sieryi kradziažoŭ aŭtamabilaŭ i inšaj majomaści na terytoryi Kobryna i Drahičyna.
Sudovaja kalehija pa kryminalnych spravach Bresckaha abłasnoha suda pryznała mužčynu vinavatym va ŭčynieńni złačynstva, praduhležanaha č. 1 art. 166 KK (zhvałtavańnie), p. 7 č. 2 art. 139 KK (zabojstv, źviazanaje z zhvałtavańniem), č. 2 art. 205 KK (tajny kradziež majomaści, učynieny paŭtorna), č. 2 art. 212 KK (kradziež šlacham vykarystańnia kampjutarnaj techniki paŭtorna), art. 421 KK (nievykanańnie patrabavańniaŭ previentyŭnaha nahladu).
Pa sukupnaści złačynstvaŭ jon pryhavorany da 23 hadoŭ pazbaŭleńnia voli z adbyvańniem pakarańnia ŭ kałonii strohaha režymu. Ź jaho spahnana ŭ jakaści kampiensacyi maralnaha ŭronu na karyść maci dziaŭčyny 100 młn. rubloŭ.
«U sudzie abvinavačvany nie raskajaŭsia ŭ tym, što zrabiŭ. Vinu pryznaŭ častkova i tolki pa epizodach kradziažoŭ», — dapoŭniŭ Klaŭcevič.
Pryhavor nie nabyŭ zakonnuju moc i moža być abskardžany.
Raniej hramadzianin nieadnarazova sudzimy za kradziažy, u tym liku ŭ niepaŭnaletnim uzroście.
22 lutaha 2014 hoda jon byŭ vyzvaleny ź miescaŭ pazbaŭleńnia voli, dzie adbyvaŭ pakarańnie za kradziež. Paśla vyzvaleńnia z kałonii znachodziŭsia pad previentyŭnym nahladam.
