Ministerstva pa padatkach i zborach raspracavała instrukcyju, u jakoj raśpisany paradak kantrolu za adpaviednaściu raschodaŭ hramadzian ich dachodam. Rabić heta inśpiektary buduć na padstavie najaŭnych u rasparadžeńni padatkovych orhanaŭ źviestak ab dachodach, majomaści i inšych vydatkach hramadzian biez patrabavańnia dekłaracyi ab dachodach i majomaści. Adpaviedny dakumient apublikavany 13 kastryčnika na Nacyjanalnym pravavym partale.
Tut.by
U čym hałoŭnaja asablivaść novaj instrukcyi, bo na spravie MPZ i raniej vyjaŭlała hramadzian, «jakija žyvuć nie pa srodkach»? Jak praviła, u pole zroku padatkovych orhanaŭ traplali tyja, chto doŭha nie pracuje, ale ździajśniaje traty, abo tyja, chto dazvalaje sabie darahija pakupki — aŭto, elitnyja kvatery i hetak dalej. Takim hramadzianam davodziłasia zapoŭnić dekłaracyju ab dachodach i majomaści, na padstavie jakoj padatkovaja vyrašała, što rabić dalej.
U novaj instrukcyi raśpisana trochi inšaja schiema. Padatkovy orhan na padstavie najaŭnaj infarmacyi ab dachodach, majomaści i inšych vydatkach hramadzianina składaje raźlik.
Pry hetym, pad dachodami hramadzian majucca na ŭvazie lubyja hrašovyja srodki, u tym liku pazyki, a taksama inšaja majomaść, atrymanaja ad hramadzian abo zamiežnikaŭ, asob biez hramadzianstva i arhanizacyj. Pad vydatkami majucca na ŭvazie lubyja hrašovyja srodki i majomaść, nakiravanyja hramadzianami na nabyćcio majomaści i (abo) inšyja mety.
«Raźlik składajecca za kožny kalandarny hod, pačynajučy z 1 studzienia 2015 hoda, za jaki ŭ padatkovym orhanie majucca dadzienyja ab atrymanych hramadzianinam dachodach i zroblenych vydatkach», — skazana ŭ tekście instrukcyi.
Važna adznačyć, što dakumient uličvaje i situacyju z kursami valut:
«Atrymanyja ŭ zamiežnaj valucie dachody, za košt jakich hramadzianinam zrobleny raschody, a taksama zroblenyja im u zamiežnaj valucie vydatki pieraličvajucca ŭ biełaruskija rubli pa aficyjnym kursie zamiežnaj valuty, ustanoŭlenamu Nacyjanalnym bankam Respubliki Biełaruś na datu vydatkaŭ».
Kali viadomy hod, u jakim byli atrymany dachody, ale nie viadomaja dakładnaja data, to ličyć buduć pa kursie na apošni dzień hoda.
Vydatki ŭ anałahičnym vypadku buduć ličyć pa kursie na pieršy dzień hoda, u jakim byli zrobleny traty.
Paśla taho, jak padatkovaja składzie raźlik, dadzienyja ab vydatkach i prybytkach buduć supastaŭlenyja.
«Pry hetym uličvajucca tolki sumy dachodaŭ, atrymanyja nie paźniej daty praviadzieńnia vydatkaŭ. Dachody, atrymanyja paśla daty praviadzieńnia raschodaŭ, pad uvahu nie prymajucca i ŭličvajucca jak dachod, jaki zastaŭsia ŭ rasparadžeńni hramadzianina, na nastupnyja vydatki», — udakładniajecca ŭ pastanovie.
Kali vydatki adpaviadajuć prybytkam, to inśpiektar aformić śpiecyjalnaje zaklučeńnie, jakoje budzie zachoŭvacca ŭ padatkovaj.
Kali vydatki pieravysiać dachody (albo fakt atrymańnia dachodu nie paćvierdzicca), hramadzianinu na praciahu 5 dzion nakirujuć piśmovaje patrabavańnie ab dačy tłumačeńniaŭ ab krynicach dachodu.
Heta patrabavańnie nakiroŭvajecca abo zakaznym listom pa pošcie, abo ŭručajecca asabista pad rośpis.
Dalej schiema standartnaja: na padstavie tłumačeńnia robicca ŭdakładnieny raźlik i prymajecca rašeńnie ab nieabchodnaści vypłaty padachodnaha padatku z sumy pieravyšeńnia.
Darečy, jak viadoma, z hetaha hoda padatkovaja atrymała dostup da bankaŭskaj tajamnicy: havorka idzie ab pakupnikach valuty, a taksama atrymalnikach kredytaŭ. Tady ž stała viadoma, što ŭ MPZ jość baza, jakaja ŭ aŭtamatyčnym režymie supastaŭlaje dachody i vydatki hramadzian.