Dyplamatyčnaja vajna abvastrajecca. Miensk prapanavaŭ Vašynhtonu formułu "adzin plus šeść". Hučyć vytančana, ale plus nasamreč aznačaje minus. Havorka pra toje, kab u abiedźviuch ambasadach, akramia kiraŭnika misii, zastałosia pa šeść dyplamataŭ.
Vyhladaje na toje, što eskalacyjaj dyplamatyčnaje vajny ajčynnyja stratehi raźličvajuć zrabić uražańnie nia stolki na Ameryku, kolki na Rasieju. Bačycie, jak śmieła my torhajem za baradu dziadźku Sema? A miž tym, hladziecie, Ukraina ŭžo adnoj nahoj u NATO! Vokam nie mirhniecie, jak amerykanskija supraćrakiety dzie-niebudź pad Charkavam apynucca… A pad Voršaj nia chočacie? Dyk nie ekanomcie, chalera vas biary, na zapałkach, nia ciśnicie svajoj "eŭrapiejskaj formułaj" hazavaj cany!
Voś takaja taktyka čarhovaha vyciskańnia materyjalnaj karyści sa statutu adzinaha nadziejnaha chaŭruśnika. Va ŭsiakim razie, ambasadar Surykaŭ 2 krasavika zajaviŭ, što da kanca hodu haz budzie kaštavać nie daražej za ciapierašnija 128 dalaraŭ.
Ale ž u luboha kija dva kancy. Z novaha hodu "Hazprom" pahražaje ličbaju $200. Admietna, što krynicy ŭ hetaj karparacyi (pry tym što zazvyčaj lubiać padkreślivać: my tolki biznesoŭcy, nijakaj palityki!) zaraz ahučvajuć alternatyvu, padobnuju na elementarny palityčny šantaž: maŭlaŭ, kali chočacie tannaha "błakitnaha paliva", zhadžajciesia na kanfederacyju!
Durniu zrazumieła, što "kanfederacyja" — tolki fihavy listok, kab nadać minimum prystojnaści planu inkarparacyi. Ucioki ad "eŭrapiejskaj formuły" razam ź lohikaj siurrealistyčnaj "vajny suprać Ameryki" ("formuła 1+6" i h.d.) elementarna šturchajuć Biełaruś u imperskuju pastku.
ZY. Chaj by ŭžo adrazu pierachodzili na formułu 1+5! Akurat chakiejny sastaŭ :)
