24 sakavika aktyvisty arhkamiteta pa stvareńni partyi «Biełaruskaja chryścijanskaja demakratyja» (BCHD) pieradali pradstaŭnikam Minharvykankama, Savieta ministraŭ i nižniaj pałaty Nacyjanalnaha schodu zaprašeńni ŭziać udzieł u śviatkavańni Dnia Voli.
«My pieradali ŭ dziaržorhany nacyjanalnuju simvoliku i hazietu «Narodnaja vola», u jakoj havorycca pra akcyju 25 sakavika, — paviedamiŭ sustaršynia arhkamiteta BCHD Vital Rymašeŭski. — Dalej ŭvachodu achova nas nie puściła. Pry hetym achoŭniki ŭ Minharvykankamie sprabavali śćviardžać, što bieł-čyrvona-bieły ściah — heta nie naša simvolika. Daviałosia tłumačyć im, što jana — naša, była dziaržaŭnaj, što ŭ Biełarusi nie adzin siońniašni zialona-čyrvony aficyjny ściah».
Rymašeŭski paviedamiŭ, što na mitynhu z nahody Dnia Voli 25 sakavika ŭ Minsku płanujecca pryniać rezalucyju z patrabavańniem da ŭładaŭ pryznać hety dzień nacyjanalnym śviatam Biełarusi. Bieł-čyrvona-biełamu ściahu pavinna być viernutaje «naležnaje dziaržaŭnaje miesca», padkreśliŭ palityk. «Na ściažkach, jakija my pieradavali ŭ dziaržaŭnyja viedamstvy, taksama byŭ raźmieščany hierb «Pahonia». My prapanujem minskim uładam vykarystoŭvać jaho na aficyjnych mierapryjemstvach, bo jon uniesieny ŭ rejestr historyka-kulturnych kaštoŭnaściaŭ. Chaj dva ściahi — bieł-čyrvona-bieły i zialona-čyrvony — vykarystoŭvajucca dla pačatku na aficyjnym uzroŭni chacia b razam», — dadaŭ jon.
Aktyvisty BCHD taksama razdavali siońnia zaprašeńni na śviatkavańnie Dnia Voli minčanam na Kamaroŭskim rynku, płoščy Niezaležnaści i ŭ inšych rajonach horada.
Zajaŭka na praviadzieńnie mitynhu i šeścia z nahody čarhovaj hadaviny abviaščeńnia Biełaruskaj Narodnaj Respubliki była padadzienaja ŭ Minharvykankam 3 sakavika. Šeście płanavałasia ad Akademii navuk pa praśpiekcie Niezaležnaści da parku Janki Kupały, adnak čynoŭniki źmianili maršrut: jany prapanavali arhanizataram sabrać ludziej kala kinateatra «Kastryčnik» i prajści pa vulicy Surhanava da płoščy Banhałor, dzie dazvolena pravieści mitynh.
U adkaz na heta arhanizatary zajavili, što źbiaruć ludziej u 18.25 na placoŭcy kala kinateatra «Kastryčnik», a rašeńnie ab maršrucie maršu buduć prymać sami ŭdzielniki. Pry hetym były palitviazień Mikałaj Statkievič zajaviŭ, što ŭ 17.00 navažany ŭskłaści kvietki da pomnika paetu Janku Kupału ŭ adnajmiennym skviery, paśla čaho nakirujecca da miesca zboru ŭdzielnikaŭ śviatkavańnia.
