Prahrama, u ramkach jakoj Biełaruś atrymaje kredyt Jeŭrazijskaha fondu stabilizacyi i raźvićcia (JEFSR), praduhledžvaje skaračeńnie abjomaŭ dyrektyŭnaha kredytavańnia, paviedamlaje pres-słužba Jeŭrazijskaha banka raźvićcia, kiraŭnika srodkaŭ JEFSR.
«Z metaj bolš efiektyŭnaha vykarystańnia resursaŭ kambankaŭ, źnižeńnia ryzyk likvidnaści i kredytnych ryzyk, praduhledžvajecca skaračeńnie dyrektyŭnaha kredytavańnia na 1% i 2% VUP u 2016 i 2017 hadach, adpaviedna», — havorycca ŭ relizie.
U banku adznačyli, što hety krok razam «ź libieralizacyjaj cen, admienaj dyrektyŭnych pakazčykaŭ dla dziaržaŭnych pradpryjemstvaŭ, skaračeńniem nazapašanaha razryvu pamiž rostam realnaj zarabotnaj płaty i pradukcyjnaści pracy, mierami pa pavyšeńni pradprymalnickaj inicyjatyvy, źnižeńniem rehulatyŭnych vydatkaŭ dla biźniesu, a taksama stymulavańniem pracesu pryvatyzacyi, budzie spryjać pavyšeńniu patencyjału ekanamičnaha rostu».
Na dumku śpiecyjalistaŭ Jeŭrazijskaha banka raźvićcia, abaviazacielstvy, jakija Biełaruś pavinna była vykanać dla atrymańnia pieršaha tranšu kredytu, užo dazvolili źnizić inflacyju.
«Miery, vykananyja ŭ ramkach pieršaha tranšu prahramy, dazvolili stabilizavać asnoŭnyja manietarnyja, fiskalnyja i źniešnija pakazčyki, a taksama zakłaści asnovy doŭhaterminovaj strukturnaj transfarmacyi ekanomiki. Dvanaccacimiesiačnaja inflacyja na 1 sakavika 2016 hoda skaraciłasia da 12,8%, suprać 16,7% u papiarednim hodzie, adlustroŭvajučy jak vyniki praviadzieńnia žorstkaj hrašova-kredytnaj palityki, tak i značnaje padzieńnie suśvietnych cen», — adznačajuć u JEABR.
Akramia taho, padkreślivajecca ŭ paviedamleńni jeŭrazijskaha banka, vykanańnie biełaruskimi ŭładami kredytnaj prahramy dazvoliła stabilizavać zołatavalutnyja reziervy.
«Pa stanie na 1 sakavika 2016 hoda ŭdałosia stabilizavać vałavyja mižnarodnyja reziervy na ŭzroŭni 1,5 miesiaca impartu (z umovaj rostu hetaha pakazčyka da 2 miesiacaŭ impartu ŭ kancy prahramy)», — paviedamlaje JEABR.
Pavodle źviestak BiełaPAN, vykanańnie kredytnaj prahramy aznačaje, što Biełaruś pavinna pavialičyć uzrovień zołatavalutnych reziervaŭ ź ciapierašnich 4,1 młrd dalaraŭ da 5,4 młrd dalaraŭ u kancy 2017 hoda.
