Microsoft fiksuje rost kibierpahroz u finansavym siektary Biełarusi, paviedamiła pres-słužba biełaruskaha pradstaŭnictva kampanii.
Microsoft ukazvaje, što ŭ suviazi z rostam kolkaści kibierzłačynstvaŭ Nacyjanalny bank Biełarusi vypuściŭ rekamiendacyi da prahramnaha zabieśpiačeńnia, jakija dapamohuć skaracić ryzyku kradziažoŭ z dapamohaj kibieratak. Tak, klijentam prapanoŭvajecca ŭstanaŭlivać licenzijnaje PZ, u tym liku antyvirusnaje, mižsietkavyja ekrany (fajervoły/brandmaŭery) i rehularna ich abnaŭlać. Hetyja miery abaroniać kampjutary i mabilnyja pryłady ad virusaŭ, z dapamohaj jakich chakiery atrymlivajuć dostup da kanfidencyjnych dadzienych.
«Microsoft całkam padzialaje pazicyju Nacbanka nakont abarony karystalnikaŭ ad kibierpahroz, — padkreślivajecca ŭ pres-relizie. — Vykarystańnie kantrafaktnaha PZ ciahnie za saboj vielizarnuju ryzyku stać achviarami machlarstvaŭ u sietcy, pra što śviedčać štohadovyja daśledavańni: u pracesie pošuku, zahruzki i ŭstanoŭki pirackaha prahramnaha zabieśpiačeńnia karystalnik padviarhaje svoj kampjutar ryzycy ŭ 92 vypadkach sa 100. U kančatkovym vyniku pamier škody ad vykarystańnia pirackich «biaspłatnych» kopij prahram značna pieraŭzychodzić vydatki na kuplu licenzijnych prahram».
Pavodle dadzienych Microsoft i Group-IB (kampanija pa praduchileńni i rasśledavańni kibierzłačynstvaŭ i machlarstvaŭ z vykarystańniem vysokich technałohij), za apošni hod u krainach SND kolkaść chakierskich hrup, jakija vykradajuć srodki ŭ jurydyčnych asob, uzrasła na 60%, u toj čas jak kolkaść kradziažoŭ u fizičnych asob pavialičyłasia ŭ try razy. U 2015 hodzie była zafiksavana vialikaja kolkaść metavych napadaŭ na banki, bankamaty i karystalnickija akaŭnty, źviazanych z prymianieńniem destruktyŭnych prahram dla śpisańnia srodkaŭ z bankaŭskich rachunkaŭ.
Vierahodnaść kibieratak, źviazanych z uzłomam bankamataŭ, pavyšajecca z-za ŭstanoŭki niepatrebnych, a časam i niebiaśpiečnych prahram. Bolš za toje, u jakaści PZ u bankamatach časta vykarystoŭvajecca Windows XP, dla jakoj Microsoft spyniŭ vypusk abnaŭleńniaŭ jašče ŭ 2014 hodzie. Inžyniery pamyłkova miarkujuć, što kali bankamat pracuje, to i abnaŭlać prahramnaje zabieśpiačeńnie nie varta. Bieź nieabchodnych abnaŭleńniaŭ sistema stanovicca ŭsio bolš uraźlivaj, adznačaje Microsoft.
Najbolš papularnym vidam machlarstva staŭ kardynh, pry jakim złamyśniki vykonvajuć apieracyi z vykarystańniem płaciežnych kart i ich rekvizitaŭ. Chakiery atrymlivajuć dostup da kart pry dapamozie ŭzłomu siervieraŭ internet-kram, płaciežnych i raźlikovych sistem, a taksama piersanalnych kampjutaraŭ praz prahramy addalenaha dostupu, trajany i boty pry ŭstanoŭcy kantrafaktnaha PZ.
