Za apošni hod vypadki cieniavoj zdabyčy burštynu fiksavalisia ŭ Rovienskaj, Vałynskaj, Lvoŭskaj i Žytomirskaj abłaściach Ukrainy. Byli źniščanyja tysiačy hiektaraŭ lesu i ralli.
U Biełarusi na miažy z Ukrainaj taksama pačali nielehalna zdabyvać burštyn. Jak adznačajuć pravaachoŭnyja orhany, zdabyča ładzicca pavodle «ŭkrainskaj technalohii».
Jak piša «SB», fakty niezakonnaj zdabyčy burštynu zafiksavanyja ŭ Biarozaŭskim, Drahičynskim, Kobrynskim, Pinskim i Stolinskim rajonach.
Za niezakonnuju zdabyču burštynu na Bieraściejščynie da adkaznaści pryciahnuta bolš za dziesiać čałaviek. Pry hetym parušyli pryrodaachoŭnaje zakanadaŭstva nia tolki asoby, ale i pryvatnaje pradpryjemstva, jakoje atrymała aficyjny dazvoł na praviadzieńnie hieolaha-raźviedvalnych rabot.
Niadaŭna Kobrynski rajvykankam zabraŭ učastak u tavarystva z abmiežavanaj adkaznaściu «Ałryks». Dazvoł na vyviedku pradpryjemstva atrymała dva hady tamu. Adnak parušyła prajekt. U žniŭni na miesca raskopak vyklikali aperatyŭna-śledčuju hrupu Kobrynskaha rajadździełu milicyi, jakaja kanfiskavała vyrablenaje samatužnym sposabam abstalavańnie — z dapamohaj jaho vioŭsia hidrarazmyŭ.
Pakul pravodzicca pravierka, aceńvajecca škoda.
U žycharoŭ Biarozaŭskaha i Drahičynskaha rajonaŭ pry vobšuku kanfiskavali 103 kavałki burštynu roznych pamieraŭ. Sud Drahičynskaha rajonu prysudziŭ hetym asobam 4,5 hoda abmiežavańnia voli. Abstalavańnie i burštyn, kanfiskavanyja pry zatrymańni, nakiravanyja ŭ dachod dziaržavy.
Jašče adnu «raspracoŭku» vyjavili pinskija pamiežniki letam za kilametar ad miažy z Ukrainaj. Pa rašeńni sudu Pinskaha rajonu adzin z «staracielaŭ» zapłaciŭ štraf — 25 bazavych vieličyń, druhi — 20 bazavych. Akramia taho, ich pryciahnuli da administracyjnaj adkaznaści za samavolnuju vysiečku dreŭ.
«Parušanyja ŭčastki lesu, ralli, sienakosy na vielmi praciahły termin stanoviacca nieprydatnymi dla sielskahaspadarčaj i lesahaspadarčaj dziejnaści. Hetyja historyi sa zdabyčaj burštynu — śviedčańnie taho, što mechanizm vydačy dazvołaŭ na hieolaha-raźviedvalnyja raboty treba mianiać. U hetaj sfery pavinny pracavać prafesijnyja hieolahi, a nie drapiežnyja pryvatnyja struktury», — ličyć namieśnik staršyni Bieraściejskaha abłasnoha kamiteta pryrodnych resursaŭ i achovy navakolnaha asiarodździa Siarhiej Šylinčuk.
