U Nacyjanalnym aeraporcie Minsk nielha budzie biaspłatna parkavacca pry trecim i nastupnych ujezdach na praciahu sutak, paviedamiła pres-słužba aeraporta.
Uniesieny niekatoryja źmieny ŭ arhanizacyju darožnaha ruchu i technałohii znachodžańnia transpartnych srodkaŭ na terytoryi aeraporta.
Pry pieršym i druhim naviedvańniach na praciahu kalandarnych sutak kiroŭcam budzie davacca limit času biaspłatnaha znachodžańnia ŭ 20 chvilin. Pry trecim i nastupnych naviedvańniach košt pasłuhi znachodžańnia budzie taryfikavacca z momantu ŭjezdu na pryvakzalnuju płošču (biez pradastaŭleńnia limitu času biaspłatnaha znachodžańnia).
Jak paviedamiła BiełaPAN pres-sakratar aeraporta Śviatłana Mirončyk, sistema, jakaja kantraluje kolkaść ujezdaŭ, pracuje ŭ testavym režymie z 15 vieraśnia. Z 26 vieraśnia jaje płanujecca zapuścić u pracoŭnym režymie.
«Dla maksimalna kamfortnaha pieramiaščeńnia pasažyraŭ i aŭtamabilnaha transpartu na terytoryi pryvakzalnaj płoščy budynka aeravakzalnaha kompleksu administracyjaj Nacyjanalnaha aeraporta Minsk na praciahu apošnich hadoŭ była vykanana peŭnaja praca. U minskim aeraporcie była ŭviedziena ŭ ekspłuatacyju aŭtamatyzavanaja sistema kantrolu ruchu aŭtatranspartu na pryvakzalnaj płoščy, — adznačyła Mirončyk. — Ukaranieńnie aŭtamatyzavanaj sistemy dazvoliła pieranakiravać patoki ruchu aŭtatranspartu z pryvakzalnaj płoščy na aŭtastajanki płatnaha i biaspłatnaha zachoŭvańnia, raźmierkavać transpartnyja patoki na pryvakzalnaj płoščy, pamienšyć kolkaść darožna-transpartnych zdareńniaŭ i zabiaśpiečyć vysoki ŭzrovień avijacyjnaj biaśpieki».
Razam z tym, zaznačyła pres-sakratar, niekatoryja aŭtaŭładalniki znachodziacca na pryvakzalnaj płoščy na praciahu biaspłatnych 20 chvilin, a potym vyjazdžajuć ź jaje terytoryi i znoŭ zajazdžajuć. U asobnyja dni kolkaść ujezdaŭ adnaho i taho ž aŭtatranspartnaha srodku dachodzić da 30 u sutki. Zhodna z praviedzienym analizam takija mašyny składajuć kala 25% usiaho trafiku ruchu transpartnych srodkaŭ praz punkty ŭjezdu i vyjezdu na pryvakzalnaj płoščy. «Svaimi dziejańniami kiroŭcy stvarajuć vialikija čerhi ŭ punktach ŭjezdu i vyjezdu, padčas znachodžańnia na pryvakzalnaj płoščy parkujuć svaje transpartnyja srodki ŭ miescach prypynku hramadskaha transpartu, što stvaraje niekamfortnyja ŭmovy dla inšych aŭtaŭładalnikaŭ i naviedvalnikaŭ aeraporta», — prakamientavała pryčynu novaŭviadzieńnia pres-sakratar.
