Upraŭleńnie Śledčaha kamiteta pa Minsku pravodzić pravierku pa fakcie samavolnaj damaloŭki hrafici pa vulicy Mahiloŭskaj u Minsku vosieńniu hetaha hoda. Dla dačy tłumačeńniaŭ u staličnaje ŭpraŭleńnie SK vyklikanyja jak minimum try čałavieki, u tym liku žurnalist BiełaPAN.
Hihancki malunak, jaki simvalizuje družbu stalic Biełarusi i Rasii, byŭ naniesieny na fasady dvuch damoŭ pa vulicy Mahiloŭskaj u červieni hetaha hoda napiaredadni praviadzieńnia Dzion Maskvy ŭ Minsku pa inicyjatyvie pradstaŭnictva rasijskaj stalicy. Pracu vykanaŭ jarasłaŭski mastak Artur Kašak. Chłopčyk na malunku simvalizuje Minsk, dziaŭčynka — Maskvu (na ich majkach namalavanyja hierby haradoŭ). Hrafici vyklikała škvał krytyki i stała abjektam kpinaŭ u sacyjalnych sietkach.
U kastryčniku inšy mastak damalavaŭ na hrafici novy elemient — kalučy drot u vianku dziaŭčynki i bukiecie chłopčyka. U kamientary BiełaPAN jon rastłumačyŭ svaje dziejańni tak: «Mnie stała soramna za padarunak svaich maskoŭskich kalehaŭ, i ja vyrašyŭ nadać hetamu choć niejki sens. Kalučy drot - dobry, šmatsłajovy simvał i całkam darečny, kali havorka idzie pra adnosiny Rasii ź inšymi krainami».
U listapadzie hrafici viarnuli raniejšy vyhlad. Jak paviedamlała pres-sakratar Minharvykankama Alena Mochor, haradskija ŭłady majuć namier vystavić rachunak nieviadomamu mastaku za praviedzienuju pracu ŭ sudovym paradku.
