Prezident Biełarusi vykazaŭ svajo mierkavańnie z nahody masavaha atručeńnia ŭ Irkucku kancentratam dla vannaŭ «Hłoh» i zaklikaŭ čynoŭnikaŭ i siłavikoŭ nie dapuścić takoha ŭ Biełarusi. Heta zajava prahučała ŭ siužetach biełaruskich telekanałaŭ ANT i «Biełaruś-1».
president.gov.by
Na naradzie 26 śniežnia ŭ Minsku z pradstaŭnikami ŭłady ŭ tym liku padymalisia i pytańni biaśpieki padčas kaladnych i navahodnich śviataŭ. Alaksandr Łukašenka akcentavaŭ uvahu siłavikoŭ na tym, što «treba zrabić usio, kab na vulicach było spakojna, kab ludzi praviali narmalna śviata».
«I hladzicie, kab nie adbyłosia jak u Rasii. Jany pačali padymać akcyzy na ałkahol, zrabili zavobłačnyja ceny na śpirtnyja napoi, i ludzi pačynajuć pić barmatuchu, jak heta było ŭ nas u savieckija časy», — skazaŭ kiraŭnik krainy, majučy na ŭvazie masavuju hibiel ludziej u Irkucku.
«Treba spynić heta bałaŭstvo z hetymi padatkami na śpirtnoje. Nu śviaty… Takija našy ludzi-słavianie. I vypić lubiać, i zakusić. Nie treba ich šturchać da taho, kab pić hłoh ci jašče štości. Treba heta mieć na ŭvazie, jak by heta niepapularna ni prahučała z maich vusnaŭ», — dadaŭ kiraŭnik dziaržavy.
Nahadajem, u śniežni ŭ rasijskim Irkucku adbyłosia masavaje atručeńnie ludziej, ad jakich na siońniašni dzień pamierli 77 čałaviek. Zahinułyja ŭžyvali kancentrat dla vannaŭ «Hłoh», jaki utrymlivaŭ zamiest paznačanaha na etykietcy etyłavaha mietyłavy śpirt.
