Minski haradski sud pryznaŭ zakonnaj pastanovu namieśnika hienieralnaha prakurora Biełarusi Alaksieja Stuka ad 17 studzienia zadavolić prośbu Hienprakuratury Azierbajdžana ab vydačy rasijska-izrailskaha błohiera Alaksandra Łapšyna dla pryciahnieńnia jaho da adkaznaści pa artykułach 282.2 i 318.2 Kryminalnaha kodeksa Azierbajdžana. Pasiadžeńnie Minharsuda prajšło 26 studzienia ŭ zakrytym režymie, abviaščeńnie prysudu — u adkrytym.
Takim čynam, skarhu Łapšyna na rašeńnie Hienprakuratury ab jaho vydačy sud pakinuŭ biez zadavalnieńnia. Rašeńnie Minharsuda moža być abskardžana ŭ Viarchoŭnym sudzie. Paśla suda abarona zajaviła, što maje namier skarystacca hetym pravam.
Razhlad skarhi Łapšyna prachodziŭ u jaho prysutnaści. Padčas suda błohier znachodziŭsia ŭ kletcy. Praces viała sudździa Luboŭ Simachina. U zale prysutničali konsuł Rasii Ihar Karakin i namieśnik kiraŭnika pasolstva Izraila ŭ Biełarusi Julija Račynski-Śpivakoŭ.
Błohier i padarožnik Alaksandr Łapšyn, jaki maje izrailskaje i rasijskaje hramadzianstva, abvinavačvajecca ŭ tym, što, «ustupiŭšy pa papiaredniaj zmovie ŭ złačynnuju suviaź ź niavyznačanymi asobami i stvaryŭšy arhanizavanuju złačynnuju hrupu, u krasaviku 2011 hoda i ŭ kastryčniku 2012 hoda biez najaŭnaści adpaviednych dakumientaŭ, abminajučy kantrolna-prapusknyja punkty, niezakonna pierasiek dziaržaŭnuju miažu Azierbajdžanskaj Respubliki».
Łapšyn byŭ zatrymany ŭ Minsku 14 śniežnia 2016 hoda pa zapycie Azierbajdžana, jaki abviaściŭ jaho ŭ mižnarodny vyšuk za niezakonnaje naviedvańnie Nahornaha Karabacha.
Viadoma, što MZS Izraila źviartałasia da ŭładaŭ Biełarusi z prośbaj nie ekstradavać Łapšyna ŭ Azierbajdžan. Akramia taho, Izrail pa dypłamatyčnych kanałach damahaŭsia ad Baku spynieńnia kryminalnaha pieraśledu błohiera, paviedamlali izrailskija ŚMI.
Rasija taksama vystupiła suprać ekstradycyi Łapšyna ŭ Azierbajdžan — pra heta zajaviŭ 17 studzienia ministr zamiežnych spraŭ RF Siarhiej Łaŭroŭ.
Aktyŭny ŭdzieł u losie zatrymanaha błohiera brali pradstaŭniki pasolstvaŭ Izraila i Rasii ŭ Biełarusi.
Rašeńnie Hienprakuratury Biełarusi ab ekstradycyi Łapšyna ŭ Azierbajdžan było ŭručana błohieru 18 studzienia.
