Biejonse i Jay Z pabralisia šlubam u 2008.
Amierykanskaja śpiavačka Biejonse naradziła dvajniataŭ, paviedamlajuć amierykanskija ŚMI. Dakładnaja data naradžeńnia i poł pakul nie vydajucca.
Paćvierdžańnia ad samoj śpiavački pakul niama, ale ŭ minułuju piatnicu fatohrafy zafiksavali, jak jana ŭvachodziła ŭ dźviery balnicy ŭ Łos-Andželesie, što dało padstavu dla śpiekulacyj u presie. Pra naradžeńnie dziaciej paviedamili amierykanskija časopisy Entertainment Weekly, Us Weekly i People.
Biejonse zamužam za rep-vykanaŭcam Jay Z. Pra toje, što para čakaje dzicia, śpiavačka abviaściła ŭ lutym, raźmiaściŭšy ŭ svaim «Instahramie» fatahrafiju, na jakoj bačnaja ciažarnaść. Hety post staŭ samym papularnym pa liku łajkaŭ za ŭvieś čas isnavańnia «Instahrama».
Za 15 hadzin fota nabrała bolš 7,5 młn łajkaŭ, ź ich za 1,4 młn pryjšlisia na pieršyja paŭhadziny paśla publikacyi.
Biejonse pryśviaciła temie maciarynstva cełuju fotasiesiju. Na sajcie śpiavački apublikavana videašou, dzie fatahrafii pieramiažoŭvajucca videaklipami, a taksama paetyčnymi tekstami pra maciarynstva i antyčnych bahiń, jakija ŭvasablajuć siłu žanočaha duchu.
U šlubnaj pary ŭžo jość piacihadovaja dačka Blu Ajvi.
Biejonse — adna z samych paśpiachovych artystak u historyi muzyki, jana atrymała 20 premij «Hremi» i bolš za 60 naminacyj. U 2011 hodzie była ŭhanaravanaja premijaj časopisa Billboard «Artyst tysiačahodździa».
U 2013 hodzie Biejonse vykonvała himn ZŠA na inaŭhuracyi Baraka Abamy.
Blu Ajvi taksama ŭziała ŭdzieł u fotasiesii svajoj mamy.
Cikava, što na minułym tydni dvajniaty naradzilisia ŭ jašče adnoj zornaj pary: u akciora Džordža Kłuni i jaho žonki Amał. Ich nazvali Eła i Alaksander.
