U minułym miesiacy novy sposab zarobku ŭ sietcy pryvioŭ da deficytu videakart dla piersanalnych kampjutaraŭ u niekatorych krainach. Usia sprava ŭ tym, što pracesary videakart lepš za ŭsio spraŭlajucca z «majninham» — «zdabyčaj» kryptavalut.
U toj ža čas źjaviłasia navina, što ekśpierty prapanujuć unieści ŭ novy dekret ab biełaruskim Parku vysokich technałohij pałažeńni pra ličbavyja znaki, tokieny.
My vyrašyli rastłumačyć, što takoje bitkojn i chto źjaŭlajecca jaho emitentam. Što heta, jak heta pracuje i ci možna stać bitkojnavym miljarderam — pra heta i pojdzie razmova dalej.
1. Što takoje «bitkojn» i chto jaho emitent?
Bitkojn — heta novaje pakaleńnie valuty. Decentralizavanaja i sietkavaja valuta bitkojn była stvoranaja i pracuje tolki ŭ sietcy internet. Nichto nie kantraluje jaje, emisija valuty adbyvajecca pry dapamozie pracy miljonaŭ kampjutaraŭ pa ŭsim śviecie z vykarystańniem prahramy dla vyličeńnia matematyčnych ałharytmaŭ.
Takim čynam ni dziaržaŭnyja orhany, ni pryvatnyja kampanii nie mohuć upłyvać na bitkoin.
Ale ŭ čym sutnaść elektronnaje valuty? Ujavicie, što bitkojn — heta svojeasablivaje zołata. Zołata źjaŭlajecca kaštoŭnym z-za fizičnaj składanaści jaho zdabyčy. Kaštoŭnaść ža bitkojna palahaje ŭ vialikim patrabavańni nie čałaviečych resursaŭ, a kampjutarnych.
Bitkojny taksama handlujucca na biržach, jak i dalar ź jeŭra, i za ich taksama možna kuplać tavary ŭ internecie.
Kurs 1 bitkojna na siońniašni dzień składaje amal 2000 dalaraŭ. Niekalki dzion tamu jon byŭ kala 2500, ale kurs davoli istotna vahajecca.
2. Čym zabiaśpiečany bitkojn?
Realnyja hrošy siońnia zabiaśpiečvajucca ŭsim bahaćciem dziaržavy, jakaja dadzienuju valutu vypuskaje, a raniej hetuju funkcyju vykonvali zołata i srebra. Bitkojn ža nie zabiaśpiečany ničym.
Luby čałaviek moža zapuścić skrypt pa zdabyčy bitkojnaŭ na kampjutary i adčuć siabie mini-nacbankam.
3. Dzie i jak možna nabyć bitkojny?
Isnuje niekalki varyjantaŭ nabyćcia kryptavaluty. Naprykład, možna kupić jaje na adnoj ź bitkojn-biržaŭ (Bitfinex, VTS-Je i inš.). Jašče adzin sposab — majninh.
Sutnaść majninhu zaklučajecca ŭ tym, što kampjutary, jakija znachodziacca ŭ roznych kropkach Ziamli, vyrašajuć matematyčnyja zadačy, u vyniku jakich stvarajucca bitkojny. Dla hetaha spatrebicca jak maha bolš videakartak.
Kažučy prostymi słovami, čym bolš u vas videakartak, tym chutčej buduć vyrašacca hetyja zadačy i tym bolš budzie stvaracca kryptavaluty.
Majninh — heta i jość praces vypusku elektronnych kryptavalut.
U 2011 hodzie amierykanskaja kampanija Casascius Bitcoin Mint pačała vypusk mietaličnych bitkojn-maniet roznych naminałaŭ. Faktyčna, heta vykananyja ŭ formie maniet «aŭtanomnyja kašalki» — na ich pakazany bitkoin-adras, a sakretny kluč schavany pad adnarazovaj hałahramaj.
4. Što rabić, kali niama hrošaj chacia b na adzin bitkojn?
Bitkojny — dzialimyja adzinki, jakija dzielacca na satošy (pa imieni stvaralnika sistemy Satošy Nakamota). Tamu dla pačatku handlu bitkojnami nie abaviazkova mieć cełuju ich kolkaść.
Adzin satošy składajecca z 0,00000001 (adna stamiljonnaja) bitkojna, abo kala 0,0025 centa ZŠA.
5. Ci možna nabyć miljard bitkojnaŭ?
Vam adnaznačna nie ŭdasca stać bitkojnavym miljarderam, ale pasprabavać zarabić miljon-druhi całkam realna. Zadadzieny limit isnavańnia bitkoinaŭ — va ŭsim śviecie ich moža być 21 miljon, i pryblizna dźvie traciny ad hetaj sumy ŭžo majuć haspadaroŭ. Z kožnaj nastupnaj chvilinaj zdabyć svaju dolu ŭsio składaniej, adpaviedna, tym bolš kaštoŭnaj jana stanovicca.
Vysnovy
Usie płaciožnyja elektronnyja sistemy nie dazvalajuć vam ličyć siabie paŭnapraŭnym haspadarom kašalka. Bo kali ŭ jakoj-niebudź kampanii, niachaj heta budzie PayPal abo QIWI, uźniknuć jakija-niebudź padazreńni ŭ «niapravilnaści» vykarystańnia asabistaha rachunku, jana pakidaje za saboj prava zamarozić jaho i pry hetym nie infarmavać vas. U Bitkoin ža tolki vy źjaŭlajeciesia ŭładalnikam pryvatnaha i publičnaha kluča, heta značyć, što tolki vy možacie rasparadžacca svaimi hrašyma.
Kurs bitkoina ŭvieś čas raście. Na minułym tydni finansavy analityk i zasnavalnik inviestycyjnaj firmy Standpoint Research Roni Moas zajaviŭ, što cana bitkoina vyraście ŭdvaja ŭ nastupnym hodzie, a ŭ bližejšyja dziesiać hod jana moža dasiahnuć $ 25 000 - $ 50 000.
Nu i, napeŭna, hałoŭny plus bitkoinaŭ u tym, što na ich absalutna nijak nie moža paŭpłyvać dziaržava.
