14 listapada nia stała Alaksandra Drakachrusta. Śmierć zaśpieła jaho praź siem dzion paśla taho, jak paet, pierakładčyk i žurnalist adśviatkavaŭ svajo 85‑hodździe.
Alaksandar Drakachrust, narodžany ŭ Maskvie ŭ 1923 hodzie ŭ siamji vajskoŭca, ź Biełaruśsiu pajadnany litaralna kryvioj. Jahonaha baćku, kali toj słužyŭ u Biełaruskaj vajennaj akruzie, u 1937 hodzie rasstralali jak voraha narodu. Praz čverć stahodździa vajskovy žurnalist i rasiejski paet Alaksandar Drakachrust sustreniecca na Dalokim Uschodzie z hrupaj biełaruskich litarataraŭ, siarod jakich byŭ i Valancin Taras. Taja sustreča pieraraście ŭ siabroŭstva i pakliča rasiejskaha litaratara ŭ Miensk. Valancin Taras praciahvaje:
«Jon byŭ absalutna kryštalova sumlenny čałaviek, čałaviek ź jasna akreślenaj pazycyjaj — hramadzianskaj, čałaviečaj, vielmi humanistyčnaj. Jon byŭ charošy paet. Zusim niadaŭna vyjšła jaho knižka ŭspaminaŭ, druhaja knižka — «Što było, toje było«. Knižka najcikaviejšaja… Vielmi prašu Radyjo Svaboda pieradać majo najhłybiejšaje spačuvańnie Juryju Drakachrustu — synu Alaksandra Abramaviča. Svabodaŭcu, hołas jakoha viedajuć mnohija ŭ Biełarusi, hołas, jakim hanaryŭsia Juraŭ baćka».
Z‑pad piara Alaksandra Drakachrusta vyjšli pierakłady na rasiejskuju movu vieršaŭ Ryhora Baradulina, Mikoły Aŭramčyka, Anatola Hračanikava, Ściapana Haŭrusiova i mnohich inšych biełaruskich paetaŭ. Jon pryros da biełaruskaj litaratury i zaŭsiody byŭ na baku tych, chto adstojvaŭ jaje pravy.
Słova raźvitańnia sa spadarom Drakachrustam paeta Siarhieja Zakońnikava:
«Ja vielmi lubiŭ sustrakacca ź im i na znakamitaj Łysaj hary, i paśla ŭ Miensku. Jon byŭ śvietłym čałaviekam. I navat jahonaje abličča było śvietłym i žyćcieśćviardžalnym. Jon vielmi praŭdziva apisaŭ toje, što było ź im, ź jahonym pakaleńniem. I ja dumaju, što ŭsio dobraje, što pakinuŭ na hetym śviecie hety słaŭny čałaviek, jano zastaniecca nia tolki ź jahonymi rodnymi, jano zastaniecca z usimi jahonymi čytačami, ludźmi, jakija jaho viedali i lubili».
U Alaksandra Drakachrusta zastalisia syny Aleh i Jury i ŭnuk Kirył.
