Baćki zahinułaha ŭ Rečyckim rajonie vajennasłužačaha čaści № 5525 unutranych vojskaŭ MUS 19‑hadovaha Antona Dałhalova nie zhodnyja ź pieradadzienym im ekśpiertnym zaklučeńniem ab pryčynie śmierci syna.
Nahadajem, sałdat zahinuŭ 11 śniežnia ŭ Rečyckim rajonie.
U Homielskaj mižharnizonnaj vajennaj prakuratury, jakaja raspačała kryminalnuju spravu pa fakcie hibieli, paviedamili BiełaPAN, što
«pry źmienie ahniavoj pazicyi radavy spatyknuŭsia i ŭpaŭ, jaho hałava apynułasia na dule, a palec zastavaŭsia na kurku zbroi; adbyŭsia streł, ranieńnie prypała na hałavu, i sałdat zahinuŭ na miescy».
Pa fakcie hibieli radavoha ŭnutranych vojskaŭ MUS Biełarusi raspačata kryminalnaja sprava na padstavie artykuła «Parušeńnie praviłaŭ abychodžańnia sa zbrojaj, što paciahnuła pa nieaściarožnaści śmierć čałavieka». Sałdatu zastavaŭsia prykładna miesiac da zvalnieńnia ŭ zapas.
Jak paviedamiŭ u intervju BiełaPAN baćka zahinułaha žychar Rahačova Michaił Dałhaloŭ, u zaklučeńni ab śmierci jaho syna napisała, što jon pamior ad «adkrytaj čerapna‑mazhavoj traŭmy».
«Ale było ž ahniastrelnaje ranieńnie — čamu heta nie ŭkazana ŭ zaklučeńni? Syn nie pieršy raz udzielničaŭ u strelbach, umieŭ abychodzicca sa zbrojaj. Ja pakul nikoha nie chaču vinavacić. My z žonkaj pačakajem, pakul zakončycca razbor, śledstva pa hetaj spravie. Kamandzir roty kazaŭ nam, što jon prysutničaŭ na vučeńniach, bačyŭ, jak usio adbyłosia: maŭlaŭ,
cyn začapiŭsia naskom čaravika, upaŭ, i adrazu prahučała čarha. Viadoma, ciažka pavieryć u heta.Ja sam słužyŭ i nie mahu ŭjavić, jak takoje mahło być. U lubym vypadku my dačakajemsia vynikaŭ rasśledavańnia i budziem potym vyrašać, što rabić», — prakamientavaŭ M.Dałhaloŭ.
Pavodle słoŭ baćki, Anton z 1 pa 20 kastryčnika byŭ u adpačynku doma ŭ Rahačovie, za dva dni da śmierci telefanavaŭ damoŭ, kazaŭ, što ŭ jaho ŭsio dobra.
