Rašeńnie ab viartańni parłamientu Biełarusi statusu śpiecyjalnaha zaprošanaha ŭ Parłamienckaj asamblei Rady Jeŭropy, jakoje moža być pryniata 23 červienia na siesii PARIE ŭ Strasburhu, «nielha razhladać jak niejki padarunak». Pra heta ŭ ekskluziŭnym intervju BiełaPAN zajaviŭ dakładčyk PARIE pa Biełarusi Andrea Ryhoni.
«Pradastaŭleńnie hetaha statusu ŭviazana z pravierkami na adpaviednaść standartam Rady Jeŭropy. U maim dakładzie ŭkazany kankretnyja kryteryi: my prosim, kab biełaruskimi uładami byli zrobleny nastupnyja kroki ŭ kirunku demakratyzacyi krainy», — skazaŭ Ryhoni.
U pryvatnaści, zaznačyŭ jon, havorycca ab nieabchodnaści vykonvać takija asnovatvornyja demakratyčnyja kaštoŭnaści, jak svaboda ŭ rehistracyi palityčnych abjadnańniaŭ i ruchaŭ, svaboda ŚMI, svaboda vykazvańnia dumak, a taksama ab nieabchodnaści ŭviadzieńnia maratoryja na śmiarotnuju karu i pierahladu vybarčaha zakanadaŭstva Biełarusi.
Jeŭrapiejski palityk padkreśliŭ, što «ŭvieś hety praces padlahaje praviercy», jakuju buduć ažyćciaŭlać palityčny kamitet PARIE i padkamitet pa Biełarusi pry ŭdziele jak pradstaŭnikoŭ biełaruskaha parłamienta, hetak i pradstaŭnikoŭ apazicyi.
«U maim dakładzie ŭstanoŭleny termin u adzin hod dla taho, kab pravieryć realizacyju hetych krokaŭ, — skazaŭ Ryhoni. —
I heta nie prosta pusty huk abo bałbatnia, bo Rada Jeŭropy i PARIE chočuć bačyć kankretnyja vyniki. Praz hod status śpiecyjalnaha zaprošanaha moža być abo pradoŭžany, abo admienieny pa vynikach pravierki».
Dakładčyk taksama zaznačyŭ, što ŭ vypadku stanoŭčaha rašeńnia ab viartańni statusu śpiecyjalnaha zaprošanaha na siesii PARIE budzie zaprašacca nie tolki aficyjnaja delehacyja Biełarusi, ale i delehacyja apazicyi. Pryčym zaprašeńnie dla apazicyi na ŭdzieł u pracy PARIE budzie nasić pastajanny charaktar, padkreśliŭ Ryhoni.
Jon taksama zajaviŭ, što PARIE budzie praciahvać sačyć za chodam rasśledavańnia vypadkaŭ źniknieńnia palitykaŭ i žurnalista ŭ Biełarusi ŭ 1999—2000 hadach. «My jakraz ruchajemsia ŭ hetym kirunku, — skazaŭ palityk. — Kali my dabjemsia adnaŭleńnia statusu śpiecyjalnaha zaprošanaha dla Biełarusi, to heta zrobić nas bolš mocnymi, u tym liku i ŭ tym, kab padšturchoŭvać praces rasśledavańnia hetych vypadkaŭ».
Kažučy ab novaj palitycy Rady Jeŭropy ŭ dačynieńni da Biełarusi, Ryhoni zaznačyŭ, što arhanizacia «šukaje novyja šlachi dla taho, kab akazvać upłyŭ na situacyju».
«My ŭbačyli, što izalacyja Biełarusi i faktyčna aŭtaizalacyja z boku biełaruskich uładaŭ nie prynieśli nijakich dabrot krainie. Praktyčna situacyja zastavałasia zamarožanaj na praciahu 10 hadoŭ, — kanstatavaŭ Ryhoni. — My vierym, što nadyšoŭ taki momant, kali treba dziejničać bolš aktyŭna, kab tut pačuli hołas Rady Jeŭropy, kab u Biełarusi ŭzrastała ŭśviedamleńnie nieabchodnaści vykanańnia takich kaštoŭnaściej, jak pravy čałavieka, pravavaja dziaržava. My chočam padšturchnuć ułady da naładžvańnia kanstruktyŭnaha i chutkaha dyjałohu».
Siońniašniaje adkryćcio ŭ Minsku infarmacyjnaha centra Rady Jeŭropy rasceńvajuć jak adzin z krokaŭ pa zbližeńni bakoŭ.
«Pakul heta maleńki centr, ale kali my adnovim status śpiecyjalnaha zaprošanaha, to zmožam prasić ab adkrycii bolšaha ofisa RIE. Heta značyć, pašyryć prysutnaść arhanizacyi ŭ Biełarusi, kab ludzi mahli bolš daviedacca pra RIE», — padkreśliŭ jeŭrapiejski palityk.
