Z vyšyni siońniašniaha dnia, rašeńnie ŭznačalić minskaje «Dynama» było pamyłkaj, zajaviŭ kanadski chakiejny śpiecyjalist Hlen Chenłan na raźvitalnaj pres-kanfierencyi ŭ Minsku 3 listapada.
Pavodle słoŭ Chenłana, jon nie raźličvaŭ, što daviadziecca adjazdžać tak chutka. Kanadziec adznačyŭ, što skončyŭ treniravać paŭnočnaamierykanskija kamandy i pierajechaŭ spačatku ŭ Finlandyju, a zatym u Biełaruś, kab lepš zrazumieć jeŭrapiejski chakiej i bolš hruntoŭna padrychtavać biełaruskuju zbornuju da Alimpijady ŭ Vankuviery.
Na pytańnie, ci mahła adstaŭka z pasady hałoŭnaha treniera «Dynama» być inicyjavana kim-niebudź, chto staić vyšej za staršyniu Fiederacyi chakieja Uładzimira Navumava, Chenłan adkazaŭ: «Ja nie viedaju, chto za kim staić ni tut, ni ŭ NCHŁ. Viedaju tolki, kaho zvolnili, i abodva razy heta byŭ ja».
Chenłan nie pahadziŭsia z zajavaj Navumava, što pry im kamandzie nie chapała charaktaru i trenierski štab nie zdoleŭ by jaho vychavać:
«Z usich kamand, ź jakimi ja pracavaŭ, u hetaj najmacniejšy charaktar». Pavodle jaho słoŭ, hulcy vykładvalisia na 100%, niahledziačy na traŭmy.
U toj ža čas były nastaŭnik «Dynama» paćvierdziŭ infarmacyju kiraŭnika fiederacyi,
što ŭ Minsku jon atrymlivaŭ stolki, kolki nikoli raniej u svajoj trenierskaj karjery.
Chenłan iznoŭ zajaviŭ, što sam nikoli nie prasiŭsia ŭ adstaŭku, pra što nie raz kazaŭ Navumaŭ. 2 listapada ŭ intervju sajtu «Dynama» i haziecie «Priessboł» kiraŭnik FCHRB adznačyŭ, što dla jaho «było dziŭnym čuć jaho [Chenłana] pryznańni, maŭlaŭ, jon sam nie prasiŭ pra adstaŭku».
«Jak ža nie, kali za 10 dzion da taho, jak jana adbyłasia, jon užo svaje rečy z kabinieta vynies!» — zajaviŭ Navumaŭ.
«Paśla adnaho z matčaŭ, mahčyma sa SKA («Dynama» paciarpieła tady čaćviortaje paražeńnie zapar. — BiełaPAN.), da mianie padyšoŭ hienieralny dyrektar Alaksandr Bieły i paviedamiŭ, što zaŭtra a 9-j hadzinie schod, na jakim mohuć być nie samyja pazityŭnyja naviny,
budź hatovy źbirać rečy. Ja skazaŭ žoncy i niekalkim siabram u Paŭnočnaj Amierycy, što, mahčyma, mianie zvolniać.
Ale nazaŭtra ŭsio źmianiłasia, zvalnieńnia nie było», — skazaŭ Chenłan.
Z novym hałoŭnym trenieram «Dynama» Alaksandram Andryjeŭskim Chenłan paśla jaho pryznačeńnia nie razmaŭlaŭ. «My ź im sustrakalisia raniej. Heta vielmi pryjemny čałaviek, i ja žadaju jamu pośpiechu», — skazaŭ kanadziec.
***
Hlen Chenłan rastłumačyŭ matyvy svajho sychodu z pasady hałoŭnaha treniera zbornaj Biełarusi.
«Kali mianie zvolnili z «Dynama», ja nie chacieŭ praciahvać pracu sa zbornaj. Adnak była meta, mara — pajechać na Alimpijskija hulni, tamu ja vyrašyŭ pradoŭžyć. Ale kali pačałasia padrychtoŭka da Kubka Paleśsia, ja zrazumieŭ, što niama takoha pačućcia, jakoje było raniej, tamu ja vyrašyŭ pakinuć pasadu.
Ja nie skažu, što zapał źnik, ale štości źmianiłasia. Mahčyma, heta nie zusim pravilna ŭ dačynieńni da hulcoŭ i fiederacyi», — skazaŭ Chenłan.
«Lišniaj nahodaj zadumacca» stała taksama tok-šou «Vybar» telekanała ONT 26 kastryčnika, jakoje było pryśviečana adstaŭcy kanadca z pasady hałoŭnaha treniera «Dynama». «Niespraviadliva ŭ dačynieńni da hulcoŭ, trenieraŭ, krainy mieć treniera zbornaj, jaki nie maje poŭnaj padtrymki», — rastłumačyŭ Chenłan.
Pavodle jaho słoŭ, rašeńnie pakinuć zbornuju było pryniata viečaram u subotu, 31 kastryčnika.
