Dackija navukoŭcy dakazali, što vykarystańnie mabilnikaŭ nie ŭpłyvaje na rak hałaŭnoha mozhu.
Hrupa navukoŭcaŭ z Dackaha tavarystva baraćby z rakavymi zachvorvańniami (Danish Cancer Society) pierakanałasia ŭ tym, što kolkaść puchlin ŭ mozhu ŭ darosłych ludziej nie źmianiłasia z pačatkam vykarystańnia mabilnikaŭ. To bok, mabilnaja suviaź na rak nie paŭpłyvała, paviedamlaje BBC News. Vyniki daśledavańnia byli apublikavanyja ŭ časopisie «Journal of the National Cancer Institute».
Navukoŭcy vyvučyli ŭzrovień zachvorvańnia na rak mozhu ludziej ad 20 da 79 hadoŭ z Danii, Finlandyi, Narviehii i Šviecyi.
Z tych časoŭ jak mabilniki stali dastupnymi, źmianieńniaŭ ŭzroŭniu zachvorvańniaŭ nie adbyłosia.
Raniej byli zaaściarohi, što elektramahnitnaje pole, što vyklikana razmovami pa mabilnym, moža apynucca faktaram ryzyki dla puchlin ŭ mozhu, adnak bijałahičnaha miechanizmu, jaki pakazaŭ by najaŭnaść takoj mahčymaści, vyjaŭlena nie było. U pracesie daśledavańnia byli vykarystanyja źviestki pra 59 684 vypadkaŭ vyjaŭleńnia puchlin z 1974 pa 2003 hod siarod 16 młn darosłych ludziej. Adnak vučonyja ličać, što spyniać daśledavańni ŭ hetym napramku pakul rana, mahčyma, što ŭ takich vypadkach prosta patrabujecca bolš času, kab ŭpłyŭ telefonu vyjaviŭsia.
Pytańnie pra toje, ci mohuć mabilnyja telefony spravakavać rak, daŭno turbuje hramadstva. Ale niekatoryja navukoŭcy praciahvajuć nastojvać na najaŭnaści hetaj zaležnaści, zvažajučy, što ŭ takim vypadku lepš pieriestrachovacca. Naprykład, doktar Ronald Chierbierman, kiraŭnik Instytuta raku Pitsburhskaha univiersiteta, ZŠA, zajaviŭ letaś, što karektny dokaz škody mabilnych telefonaŭ moža zaniać bahata času, tady jak užo zaraz nieabchodna rabić zachady, nakiravanyja na praduchileńnie škodnaha ŭździejańnia telefonaŭ, kab vyratavać jak maha bolš ludziej, pieradusim — dziaciej. «Lepš być aściarožnymi, kab nie paškadavać potym», ‑ skazaŭ jon.
