Emir Kuviejta Šejch Mišal Al-Achmied Al-Džabier as-Sabach. Fota: Jaber Abdulkhaleg / AP
«Kab spynić zaniapad i praduchilić krach krainy, my rasparadzilisia ab nastupnym: raspuścić Nacyjanalny schod i spynić niekatoryja artykuły kanstytucyi na pieryjad, jaki nie pieravyšaje čatyroch hadoŭ.
Za hety termin kanstytucyja i ŭsie aśpiekty demakratyčnaha pracesu buduć vyvučany na pradmiet niedachopaŭ i pierahledžany ŭ duchie našaha isłamskaha šaryjatu i tradycyj, a paŭnamoctvy parłamienta buduć pieradadzieny mnie i majoj radzie ministraŭ», — zajaviŭ u svaim raptoŭnym telezvarocie da nacyi emir Kuviejta Šejch Mišal Al-Achmied Al-Džabier, pieradaje kanał Sky News Arabia.
Pa słovach emira Kuviejta, «dziejnaść niekatorych demakratyčnych intytutaŭ u krainie vykarystoŭvajecca dla źniščeńnia dziaržavy, umiašańnia ŭ paŭnamoctvy emira i padryvu prestyžu supracoŭnikaŭ słužbaŭ biaśpieki».
Sam Šejch Mišal Al-Džabier jašče da taho, jak stać emiram Kuviejta, doŭhi čas pracavaŭ u raźviedcy i inšych słužbach biaśpieki krainy.
Vinavatymi ŭ vyšejzhadanych dziejańniach emir nazvaŭ «niekatorych deputataŭ Nacyjanalnaha schodu», jakija, pavodle jahonych słovaŭ, nie zhadžalisia z prapanavanaj im kandydaturaj novaha premjer-ministra. Hetuju admovu emir uspryniaŭ, jak padryŭ ułasnaj ułady, i paabiacaŭ, što «palepšyć i stabilizuje demakratyju» u Kuviejcie.
Charakterna, što ŭ kanstytucyi Kuviejta ad 1962 hoda, na redakcyju jakoj i spasyłajecca ŭ svaim zvarocie emir, isnuje strohaja zabarona na prypynieńnie lubych pałažeńniaŭ kanstytucyi i pasiedžańniaŭ parłamienta biez abjaŭleńnia vajennaha stanovišča, abo ŭ inšych asablivych vypadkach, vyznačanych zakonam (artykuł 181 kanstytucyi Kuviejta).
Zakanadaŭčaja ŭłada ŭ krainie aficyjna naležyć nie tolki emiru, ale i parłamientu, što robić prypynieńnie pałažeńniaŭ kanstytucyi i pasiedžańniaŭ parłamienta niemahčymaj biez zhody samoha parłamienta.
Adznačym, što nievialiki pa pamiery Kuviejt źjaŭlajecca adnoj z najbahaciejšych krain śvietu. Jaho ekanomika hruntujecca na zdabyčy i prodažy nafty (kraina ŭvachodzić u top-10 pa abjomie zapasaŭ nafty i ŭzroŭni dachodaŭ na dušu nasielnictva).
Čytajcie taksama:
Błohier Blišč raskazaŭ, jak nie zmoh patrapić u Saudaŭskuju Araviju, Aman i Kurdystan