Jaŭhien Komar. Fota ź jahonaj staronki ŭ Adnakłaśnikach
Jaŭhienu Komaru 44 hady, rodam jon ź siała Šołachava Dniaproŭskaj vobłaści Ukrainy. Praŭda, amal usio žyćcio pražyŭ u Biełarusi i maje biełaruskaje hramadzianstva. Nie žanaty, dziaciej niama. Žyŭ u vioscy Rudsk Ivanaŭskaha rajona.
Komar nie vioŭ sacsietak, ale jahony pakručasty los apisany ŭ sudovych pastanovach.
Mužčyna ŭpieršyniu atrymaŭ kryminałku ŭ 2001-m hodzie. Tady jon pjany pabiŭsia z žycharom vioski Rudsk kala miascovaha doma kultury. Za heta jamu dali paŭhoda aryštu.
Praz paŭhoda Komar znoŭku sieŭ za kradziež. U sakaviku 2002-ha jon napadpitku zalez u kramu «praz vakienca pryniaćcia chleba» i skraŭ adtul «materyjalnyja kaštoŭnaści» — zvyčajna ŭ takich vypadkach kraduć zakusku i ałkahol. Sud prysudziŭ jamu dva z pałovaj hady kałonii. Hod źniali pa amnistyi.
Jaŭhien Komar. Fota ź jahonaj staronki ŭ Adnakłaśnikach
Praz try miesiacy Komar spjanu dvojčy ŭdaryŭ nažom viaskoŭca. Za heta 10 studzienia 2004 hoda Komaru prysudzili piać hadoŭ kałonii, paśla dadali termin za «niepadparadkavańnie administracyi kałonii». Vyzvaliŭsia całkam jon tolki napačatku 2010-ha.
Komar trochu ŭziaŭsia za hałavu i pravioŭ na voli ažno čatyry hady. U 2013-m suprać jaho zavodzili kryminałku za źbićcio znajomaj, ale jany pamirylisia, i sprava da suda nie dajšła. Napačatku 2014-ha suprać jaho jašče raz zaviali spravu — za kradziež nievialikaj sumy hrošaŭ, ale i tut jon vyjšaŭ z vady suchim.
Ale naprykancy 2014-ha Komar usio ž znoŭ trapiŭ za kraty. Sud pryznačyŭ jamu 2 hady strohaha režymu za paŭtorny kradziež. Vyzvaliŭsia ŭ červieni 2016-ha.
Pracy, miarkujučy pa bazam «Kibierpartyzanaŭ», jon nie znajšoŭ. A praz dva z pałovaj hady Komara znoŭku aryštavali — za kradziež i ŭchileńnie ad nahladu. Sud pryznačyŭ jamu try hady kałonii. Paśla jašče byŭ hod pazbaŭleńnia voli za parušeńnie previentyŭnaha nahladu.
Jaŭhien Komar. Fota ź jahonaj staronki ŭ Adnakłaśnikach
Pa vyzvaleńni ŭ mai 2023 hoda Komar prasiadzieŭ doma adzin miesiac. Nieviadoma, jakaja była jaho matyvacyja, ale jon pajechaŭ vajavać u PVK «Vahnier». Z 23 červienia pa 9 žniŭnia 2023 hoda jon vajavaŭ na baku Rasii.
Pa viartańni ŭ Biełaruś jamu ŭsio prabačyli i dazvolili žyć doma. Ale nieŭzabavie jon paŭtorna vyjechaŭ u Rasiju, kab praciahnuć słužbu. Tam u jaho nie zrasłosia, i jon viarnuŭsia — zatrymali jaho ŭ Homieli 24 vieraśnia 2023 hoda.
Na sudzie mužčyna kazaŭ, što nie ŭchilaŭsia ad nahladu, a chacieŭ «paŭdzielničać u SVA na baku Rasii».
Ale sud heta da ŭvahi nie pryniaŭ. 11 śniežnia 2023 hoda Komaru prysudzili hod kałonii za ŭchileńnie ad previentyŭnaha nahladu, a taksama prymusovaje lačeńnie ad ałkahalizmu, jak i ŭ inšyja razy.
Heta vośmaja sudzimaść mužčyny. Ahułam z 2001 hoda jon praviadzie za kratami amal čatyrnaccać hadoŭ.
Publikacyja zroblenaja z dapamohaj Digital Intelligence Team. Heta OSINT-prajekt, jaki supracoŭničaje z Kibierpartyzanami i inšymi demakratyčnymi strukturami dy prajektami, jakija padzialajuć demakratyčnyja kaštoŭnaści.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Stała viadomaja asoba jašče adnaho biełaruskaha najomnika: 28-hadovy Arciom napisaŭ na siabie ŭ KDB
«Bajpoł» vyjaviŭ jašče adnaho biełarusa-vahnieraŭca va Ukrainie. Heta bomž ź siamiu sudzimaściami
