«Narody Kyrhyzstana i Biełarusi pieražyvuć pytańnie Kurmanbieka Bakijeva, i heta nijakim čynam nie adabjecca na našych adnosinach», — zajaviŭ BiełaPAN kiraŭnik aparata časovaha ŭrada Kyrhyzstana Edyl Bajsałaŭ, kamientujučy ŭčarašniuju zajavu Alaksandra Łukašenki.
4 maja ŭ intervju ahienctvu Rejter prezident Biełarusi zajaviŭ, što nie źbirajecca vydavać Bakijeva novym uładam Kyrhyzstana. «Da mianie nichto aficyjna nie źviartaŭsia, — skazaŭ Łukašenka. — Ale adrazu chaču aficyjna zajavić: hetyja zvaroty buduć bieskarysnyja i źnievažalnyja dla časovaha ŭrada. Prezident Kyrhyzstana znachodzicca pad abaronaj biełaruskaj dziaržavy i prezidenta. Nie treba hetak zvanamu časovamu ŭradu źviartacca z patrabavańniem vydać Bakijeva. Kamu vydać? Ci zachaču ja jašče hutaryć z tymi, chto siońnia va ŭładzie ŭ Kirhizii».
«Heta prava biełaruskaha kiraŭnictva — nie vydavać Bakijeva, — zajaviŭ, u svaju čarhu, Bajsałaŭ. — Ale pazicyja Kyrhyzstana zastajecca niaźmiennaj: Bakijeŭ źjaŭlajecca dyktataram, jaki uzurpavaŭ uładu, a ŭvieś śviet naziraŭ za rasstrełam mirnaj demanstracyi.
Ale my nie źbirajemsia svarycca z narodam Biełarusi z‑za kryvavaha dyktatara».
Pavodle słoŭ Bajsałava, Kyrhyzstan »pavažaje suvierennaje prava Biełarusi pradastaŭlać svaju terytoryju dla trecich asob». «Ale my raźličvajem, što haścinnaściu biełaruskaha naroda nie buduć złoŭžyvać, z terytoryi Biełarusi nie budzie zychodzić pahroza stabilnaści i adnaŭleńniu palityčnaha i sacyjalna‑ekanamičnaha žyćcia Kyrhyzstana», — padkreśliŭ jon.
Kiraŭnik aparata časovaha ŭrada taksama zajaviŭ, što nakiravańnie zapytu biełaruskamu boku ab vydačy Bakijeva — heta čysta techničnaje pytańnie.
«Rana ci pozna zapyt budzie zrobleny», — skazaŭ Bajsałaŭ.
4 maja časovy ŭrad Kyrhyzstana pazbaviŭ adchilenaha ad ułady prezidenta Kurmanbieka Bakijeva prezidenckaj niedatykalnaści i daručyŭ Hienieralnaj prakuratury zabiaśpiečyć jaho ekstradycyju. Adpaviedny dekret padpisała kiraŭnik Kabinieta ministraŭ Roza Atunbajeva. U dekrecie ŭkazana, što »Bakijeŭ dapuściŭ rasstreł mirnych hramadzian i tym samym sam pazbaviŭ siabie statusu eks‑prezidenta i niedatykalnaści».
