Sudovaja kalehija pa kryminalnych spravach Bresckaha abłasnoha suda 22 červienia ŭ Łunincy vyniesła pryhavor 20‑hadovaj žycharcy vioski Łachva za zabojstva svajho novanarodžanaha dziciaci.
Jak paviedamiła staršy pamočnik prakurora Bresckaj vobłaści Volha Dźmitruk, uviečary 30 vieraśnia 2009 hoda abvinavačanaja
ŭ vannym pakoi pa miescy žycharstva naradziła chłopčyka i ŭtapiła jaho ŭ vańnie, paśla čaho vykinuła ŭ zaraśniki za prysiadzibnym učastkam svajho doma.
Trup novanarodžanaha byŭ znojdzieny 11 kastryčnika na susiednim prysiadzibnym učastku. Cieła ŭbačyli haspadary ŭčastka i paviedamili ŭ milicyju. Pavodle ich słoŭ, napiaredadni ŭviečary trupa nie było.
Ustanoŭlena, što dzicia naradziłasia danošanym i zdarovym.
Sudovaja kalehija pa kryminalnych spravach Bresckaha abłasnoha suda pryznała žančynu vinavataj na padstavie p. 2 č. 2 art. 139 Kryminalnaha kodeksa (zabojstva zaviedama małaletniaj asoby) i pryhavaryła da vaśmi hadoŭ pazbaŭleńnia voli z adbyvańniem pakarańnia ŭ kałonii ahulnaha režymu.
Prysud jašče nie nabyŭ zakonnuju moc i moža być abskardžany.
«Svajoj viny žančyna nie pryznała i admoviłasia davać pakazańni ŭ sudovym pasiadžeńni. Jana nie zamužam. U jaje jość narodžanaja pa‑za šlubam dačka 2007 hoda naradžeńnia», — skazała Dźmitruk.