Bred Fitcpatryk (Brad Fitzpatrick), zastavalnik najpapularniejšaha błogierskaha servisu internet-dziońnikaŭ LiveJournal («Žyvy Časapis») pryjechaŭ u Maskvu.
Vizyt Breta Fitcpatryka źviazany z hučnaj uhodaj. Rasiejskaja anłajn-medyjakampanija «Sup» zaklučyła «pahadnieńnie pra partnerstva dla raźvićcia supolnaści LiveJournal» z uładalnikam resursu– amerykanskaj kampanijaj Six Apart. Pahadnieńnie datyčyć častki Livejournal, jakaja karystajecca kiryličnymi šryftami.
Zhodna ź nieaficyjnaj infarmacyjaj, kampanija «Sup» atrymlivaje licenziju na absłuhoŭvańnie kiryličnych karystalnikaŭ. Kampanija «Sup», jak paviedamlaje Cnews, naležyć amerykanskamu pradprymalniku Endru Połsanu, jaki žyvie ŭ Rasiei, i rasiejskamu biznesoŭcu Alaksandru Mamutu. Endru Połsan źjaŭlajecca taksama prezydentam i hieneralnym dyrektaram kampanii «Sup».
Internet-supolnaść aktyŭna abmiarkoŭvaje pytańnie pra toje, ci nia trapiać karystalniki «Žyvoha časapisu» ŭ vyniku hetaha pahadnieńnia miž Six Apart i «Sup» pad niabačny kantrol, i ci nia buduć ich ulikovyja zapisy zablakavanyja ŭ vypadku «niadobranadziejnaści».
My źviarnulisia pa tłumačeńni da dyrektara pa markiecinhu kampanii «Sup» Ivana Zasurskaha. Jon hetak prakamentavaŭ zaklučanaje pahadnieńnie:
— Najbližejšym časam ničoha nia źmienicca. Mnie spadabałasia, jak pra heta skazaŭ Anton Nosik: nichto nia viedaje, što LiveJournal naležyć kampanii Six Apart, nichto i nie daviedvajecca pra heta, pakul ludzi nia prosiać ad Six Apart niejkaj dapamohi ci sadziejničańnia. I my ŭ «Supie» majem namier pavodzić siabie hetaksama. My chočam być prazrystymi, kab nas nie było bačna, kab my mahli akazvać niejkija pasłuhi i kab my mahli rabić niešta dla ludziej, ale pry hetym kab my nie pakazvali siabie. Kali vas cikavić, ci budziem my adcirać palityčnych inšadumcaŭ, nie, my nia budziem.
— Ci budzie ŭ kampanii «Sup» techničnaja mahčymaść zablakavać ulikovy zapis, albo hetaja funkcyja zastajecca ŭ kampanii Six Apart?
— Ja razumieju, što Radyjo Svaboda cikavicca najpierš pytańniem zachavańnia svabody słova ŭ Rasiei. LiveJournal – heta kamjunici, u jakim svaboda słova zachoŭvajecca.
— Karystalniki LiveJournal chacieli b vieryć u vašyja dobryja namiery, ale ich usio-taki cikavić, ci isnuje takaja techničnaja mahčymaść u kampanii «Sup»?
— Vy prosta nie razumiejecie, navošta my kupili LiveJournal. My kupili LiveJournal nie dla taho, kab nabyć hetuju mahčymaść, tamu nas u apošniuju čarhu heta cikavić, paviercie. Zaŭsiody, kali adbyvajucca pieramieny, karystalniki staviacca ź niekatorym niedavieram da ludziej, jakija administrujuć servis. Ale praź miesiac, praź niejki čas hety niedavier źnikaje. Što b my ni kazali zaraz, usio roŭna jość ludzi, jakija ŭ hetym usumniacca, tamu spravy zaŭsiody havorać hramčej ad słovaŭ. U vas budzie čas pravieryć našyja namiery, i ŭ vašych słuchačoŭ tym bolej.
— Dapuścim takuju hipatetyčnuju sytuacyju. Kudy pavinny źviartacca rasiejskija specsłužby, kab zablakavać ulikovy zapis?
— U Kaliforniju. Kali jany źviernucca da nas, my pieradamo zapyt u Kaliforniju. Možam pierakłaści navat, kali budzie składany zapyt.
— Na što kampanija «Sup» upaŭnavažanaja amerykanskaj kampanijaj Six Apart?
— My viadziem biznes u Rasiei.
— Što vyjhrajuć karystalniki ad hetaha pahadnieńnia?
— My zrobim tak, što ludzi ŭ Rasiei zmohuć raźmiaščać u błogach nia tolki svaje zdymki, ale i videa, i my zrobim tak, što ludzi atrymajuć intehracyju z mabilnymi telefonami, i šmat roznych inšych rečaŭ. My zrobim tak, što ŭ Rasiei LiveJournal budzie pieradavym, u tym liku technalahična, prajektam, jaki davaćmie maksymalnyja mahčymaści ludziam, jakija vyrašać im karystacca. I my nia budziem rabić ničoha, što budzie zmušać ludziej być aściarožnymi ci nie daviarać nam. Heta našaja palityka.
— A vy hatovyja tyja punkty pahadnieńnia, jakija nia jość kamercyjnaj tajamnicaj, prosta kab supakoić karystalnikaŭ LiveJournal, apublikavać u internecie?
— A nam pakul niama čaho skazać. Pakul ničoha nie pamianiałasia. Kali ŭ vas byli jakija-niebudź prablemy z tym, jak LiveJournal siabie pavodziŭ u toj čas, kali jon naležaŭ kampanii Six Apart, i vy chočacie, kab zaraz, kali my viadziem ad imia Six Apart biznes u Rasiei, kab my štości pamianiali, vy možacie prasić nas pra heta, ale my sami pa sabie asabliva mianiać-ta nia chočam. Heta nia našaja zadača.
— Ale vy razumiejecie, adkul biarucca strachi? U Rasiei źjaŭlajucca surjoznyja abmiežavańni svabody słova.
— U internecie svabodu słova jašče nichto nie admianiaŭ, ni ŭ LiveJournal, ni ŭ inšych sieciŭnych vydańniach. Heta asablivaść taho, jak raźvivajecca Rasieja. Tak, my ŭ kursie taho, što ŭ rasiejskaj medyja-prastory adbyvajucca peŭnyja pieramieny. Jany adbyvajucca daŭno. Adbyvajecca kancentracyja medyja-aktyvaŭ, u tym liku adbyvajecca kancentracyja medyja-aktyvaŭ u rukach paŭdziaržaŭnych i dziaržaŭnych kampanij. Ale heta toje, što adbyvajecca ŭ afłajnavych medyjach. Kali my havorym pra anłajnavyja medyi, pakul što niama nivodnaha faktu, jaki b paćvierdziŭ jakija-kolviek novyja pavievy. Dačakajmasia chacia b, kab chto-niebudź pačaŭ pretendavać na heta, pierš jak my pačniem pra heta niepakoicca.
