Były milicyjant, jaki vyjaviŭ falsifikacyi na parłamienckich vybarach, nie źbirajecca pakidać krainu i ŭ vypadku sudovych pracesaŭ hatovy davać pakazańni.
Były milicyjant Mikałaj Kazłoŭ, što ahučyŭ fakty falsifikacyj na parłamienckich vybarach 2008 hoda, kaža, što nie źbirajecca źjazdžać z krainy i ŭ vypadku sudovaha pracesu hatovy davać pakazańni.
U paniadziełak Mikałaj Kazłoŭ razam z staršyniom AHP Anatolem Labiedźkam davaŭ pres‑kanfierencyju. Sprava ŭ tym, što dva hady nazad falsifikacyi byli vyjaŭlenyja jakraz na Staravilenskaj akruzie, dzie bałatavaŭsia Labiedźka.
«My paznajomilisia 20 chvilin tamu.
Dla mianie hety čałaviek prykład mužnaści», — pačaŭ pres‑kanfierencyju Anatol Labiedźka.
Lider AHP nahadaŭ, što rabiŭ zapyty ŭ Hienieralnuju prakuraturu adnosna falsifikacyj vynikaŭ vybaraŭ, pra što zajaŭlali Alaksandr Łukašenka i Kanstancin Sumar. «Adkaz byŭ taki, što albo hetyja ludzi niedziejazdolnyja, albo chłusy», — kaža palityk.
«Mikałaj Kazłoŭ skazaŭ, što falsifikacyi byli, ale va ŭron alternatyvie ŭłady. Robim vybar: chto kaža praŭdu».
Taksama Labiedźka ciapier rychtuje zvarot da deputata pałaty pradstaŭnikoŭ Samasiejki, jaki byŭ abrany pa Staravilenskaj akruzie. Staršynia AHP pierakanany, što ŭ luboj krainie parłamientar paśla takoha skandału pavinien chacia b časova skłaści ź siabie abaviazki.
«Čakaŭ, što prakuratura budzie pravodzić niejkaje śledstva. Ciapier ža ja baču, što pačynajucca novyja vybary, ale ničoha nie mianiajecca. Ja źbirajusia davać pakazańni, kali niechta raspačnie spravu», — skazaŭ M.Kazłoŭ.
Dla byłoha milicyjanta było nie vielmi zvykła davać pres‑kanfierencyju. Skazaŭ, što pryjšoŭ na jaje, kab nichto potym nie padumaŭ, što admaŭlajecca ad svaich słovaŭ.
Čamu Kazłoŭ vyrašyŭsia na heta? «Jość niejkija pytańni, jakija bolš vysokija. Ja chaču, kab było spraviadliva. Mnie pazvaniła šmat kaleh, siabroŭ vykazać padtrymku», — kaža milicyjant.
Nijakaha cisku na siabie jon jašče nie adčuŭ. Što datyčyć siabroŭ učastkovych kamisij, to kaža, što razumieje ich.
«Ja nie źbiraŭsia nikoha łavić za ruku. Tak vyjšła, što ja pabačyŭ hety ŭkid biułnteniaŭ. Staršynia kamisii bajałasia, joj było strašna. Pryčym, nie mianie, čałavieka ŭ formie, a taho, što nie ŭkinie hetych biuleteniaŭ», — skazaŭ padpałkoŭnik.
Anatol Labiedźka havoryć, što jamu ŭžo patelefanavała dvoje staršyń kamisij, jakija hatovyja ŭ budučyni taksama ahučyć fakty falsifikacyj. «Prosta niekamu treba pačać», — kaža staršynia AHP.
Mikałaj Kazłoŭ ličyć, što hetuju spravu možna chutka rasśledavać, kali b u hetym była zacikaŭlenaść pravaachoŭnych orhanaŭ.
«U milicyi roznyja ludzi. U tym liku i prystojnyja. Škada, što apošnija pačali zvalniacca z słužby. Mnie budzie prosta, bo ja nie chłušu», — skazaŭ milicyjant.
