Jak u SIZA KDB katavali Alaksandra Atroščankava

Žonka palitviaźnia Darja Korsak źviarnułasia ŭ Hienprakuraturu.

Hienieralnamu prakuroru Respubliki Biełaruś

Korsak Darji Siarhiejeŭny

Zajava

(Ab prymianieńni katavańniaŭ i žorstkich, nialudskich i prynižajučych čałaviečuju hodnaść adnosinach u SIZA KDB)

Ja źjaŭlajusia žonkaj Atroščankava Alaksandra Siarhiejeviča, z 20 śniežnia 2010 h. pa hety dzień jon znachodzicca ŭ SIZA KDB.

28 lutaha 2011 z roznych internet-krynic (kopii internet-artykułaŭ u dadatku) ja daviedałasia, što eks-kandydat u prezidenty Alaksiej Michalevič, znachodziačysia ŭ śledčym izalatary KDB (dalej SIZA KDB) z 2010/12/20 pa 2011/02/19 padviarhaŭsia katavańniam, i inšym žorstkim biesčałaviečnym i prynižajučym čałaviečuju hodnaść sposabam abychodžańnia i pakarańnia z boku supracoŭnikaŭ śledčaha izalatara. Pa faktach hetaha Alaksiejem Michalevičam była padadzienaja zajava ŭ Hienieralnuju Prakuraturu Respubliki Biełaruś.

Z zajavy Michaleviča mnie stała viadoma, što ludzi ŭ maskach pryčyniali jamu fizičnuju bol z vykarystańniem kajdankoŭ, prymušali raspranacca dahała, stavili ŭ takim vyhladzie «na raściažku», što davała jamu mocnyja fizičnyja i dušeŭnyja pakuty.

Z 20 śniežnia 2010 hoda pa hety dzień, moj muž, Alaksandr Siarhiejevič Atroščankaŭ, znachodzicca ŭ SIZA KDB. Takim čynam, pieryjad času, apisany A. Michalevičam, pryjšoŭsia i na ŭtrymańnie majho muža.

1 sakavika 2011 na sudovym pracesie ŭ mianie była karotkaja mahčymaść pierahavaryć z mužam i jon paćvierdziŭ, što hetak ža padviarhajecca katavańniam i žorstkim biesčałaviečnym adnosinam u SIZA KDB.

Bolš padrabiaznuju infarmacyju ja daviedałasia paśla vyniasieńnia Alaksandru prysudu 2 sakavika 2011 hoda.

Jamu ŭdałosia paviedamić, što jaho taksama prymušajuć raspranacca, staviać u takim vyhladzie «na raściažku» na praciahły čas, što dastaŭlaje jamu mocnyja fizičnyja pakuty, bolš taho, u raspranutym vyhladzie jaho prymušajuć rabić fizičnyja praktykavańni, jon nie paśpieŭ paviedamić, da čaho pryvodzić admova padparadkoŭvacca takoha kštałtu zahadam,

ale jon daŭ zrazumieć, što sankcyi za nievykanańnie takich źnievažalnych i chvaravitych dziejańniaŭ mohuć być samymi žorstkimi. Hetak ža mnie stała viadoma, što tyja ž asoby ŭ maskach nieadnarazova pravodzili balučyja manipulacyi z naručnikami ŭ adnosinach da majho muža.

Akramia hetaha, pieršy čas A.Atroščankavu prychodziłasia znachodzicca ŭ SIZA KDB bieź śpiecyjalnaha spalnaha miesca i da hetaha času jon znachodzicca ŭ kamiery bieź śpiecyjalna abstalavanaha sanitarnaha vuzła, što taksama liču žorstkimi, biesčałaviečnymi i prynižajučymi čałaviečuju hodnaść adnosinami.

Na praciahu ŭsiaho papiaredniaha śledstva, a mienavita z 20 śniežnia 2010, pa hety dzień, administracyja SIZA KDB nie znajšła mahčymaści pradastavić advakatu pamiaškańnie dla sustrečy z maim mužam sam-nasam, što było adlustravana advakatam u knizie skarhaŭ i prapanoŭ, u skarhach, a taksama ŭ sprečkach padčas sudovaha pasiedžańnia. Rasceńvaju takoha kštałtu dziejańni administracyi jak sprobu schavać fakt katavańniaŭ i inšych žorstkich biesčałaviečnych i źnievažajučych hodnaść sposabaŭ abychodžańnia ŭ adnosinach da Alaksandra Atroščankava.

U suviazi z hetym, uličvajučy charaktar ŭździejańnia na majho muža, zakrytaść SIZA KDB, jak ustanovy i niezacikaŭlenaść administracyi ŭ abjektyŭnaści acenki situacyi, prašu:

1. Terminova pravieści pravierku vykładzienych faktaŭ, a taksama apytać majho muža i asob, jakija ŭtrymoŭvalisia ź im u adnych kamierach u pryvatnym paradku i sposabam, jaki moh by vyklučyć cisk z boku administracyi SIZA KDB i dalejšyja represii suprać ich;

2. Pryniać miery prakurorskaha reahavańnia;

3. Paviedamić ab vynikach pravierki va ŭstanoŭlenyja zakonam terminy.

2011/03/04

Darja Korsak