7 śniežnia ŭ prezydyjumie Vyšejšaha haspadarčaha suda (VHS) prajšli papiarednija słuchańni pa spravie carkvy «Novaje žyćcio», na jakim baki vykazali patrabavańni i ŭdakładnili svaje pazycyi. Mienharvykankam pazycyi nie źmianiŭ. Heta paćvierdziŭ pradstaŭnik Mienharvykankamu juryskonsult Kamitetu pa ziemleŭparadkavańni Ihar Kaśpiarovič. Jon dadatkova adznačyŭ, što «carkva, jak ułaśnik pamiaškańnia nia mieła prava vykarystoŭvać jaho (pamiaškańnie) ni ŭ jaki sposab». Varta nahadać, što VHS raspačaŭ razhlad hetaj spravy ŭ pieršaj instancyi paśla taho, jak 4 listapada prezydyjum VHS admianiŭ papiarednija rašeńni Mienskaha haspadarčaha sudu adnosna carkvy.
Pradstaŭniki carkvy taksama paćvierdzili niaźmiennaść namieraŭ, zaznačyŭšy, što majuć dadatkovyja patrabavańni. Jany zaklučajucca ŭ prośbie źmianić metavaje pryznačeńnie budynku na kultavaje, a taksama źmianić metavaje pryznačeńnie ziamielnaha nadziełu. Pa słovach praŭnika carkvy Siarhieja Łukanina, robicca heta dla taho, kab carkva iznoŭ nie apynułasia pa-za zakonam. Jon adznačyŭ taksama, što pazycyja Mienharvykankamu śviedčyć pra toje zaciahvańnie vyrašeńnia pytańnia.
Data nastupnaha pasiadžeńnia pavinna być ahučanaja ciaham dvuch tydniaŭ. Sudździa Karatkievič rastłumačyła, što baki atrymajuć adpaviednaje paviedamleńnie poštaj.
8 śniežnia carkva «Novaje Žyćcio» atrymała list z Upraŭleńnia ŭnutranych spravaŭ Administracyi Centralnaha rajonu Miensku za podpisam načalnika ŭpraŭleńnia V.A.Siniakova. U liście paviedamlajecca, što carkvie admoŭlena ŭ zaviadzieńni kryminalnaj spravy ŭ dačynieńni da žurnalistki Ł. Džurajevaj, a taksama ŭdzielnikaŭ jaje siužetu A.Rabicavaj i I.Januškieviča. Nahoda – adsutnaść u dziejańniach apošnich prykmietaŭ złačynstva.
Carkva maje prava abskardzić dadzienaje rašeńnie ŭ prakuratury Centralnaha rajonu Miensku. Nahadajem, što siužety, zroblenyja Ł.Džurajevaj, vyklikali pratest u viernikaŭ carkvy «Novaje žyćcio», bo, na ich dumku, mieli paklopnicki charaktar, nie adpaviadali rečaisnaści i nanieśli škodu reputacyi carkvy. Kiraŭnictva carkvy prapanavała kanału STV abvierhnuć ahučanuju infarmacyju, pryhraziŭšy, u advarotnym vypadku, źviarnucca ŭ pravaachoŭčyja orhany.
Na siońnia ŭ carkvie prachodzić štodzionnaja vachta: uvieś čas u budynku carkvy znachodziacca 10-15 čałaviek. Tak budzie da kančatkovaha vyrašeńnia sytuacyi.
