Z toj pryčyny, što hałoŭny najmalnik kvatery ŭtrymlivajecca ŭ SIZA KDB za ŭdzieł u akcyi pratestu 19 śniežnia.
Letaś Alaksandr Kłaskoŭski jak šmatdzietny baćka atrymaŭ mahčymaść pabudavać kvateru pa ilhotnym kredycie i navat paśpieŭ zrabić niekalki ŭnioskaŭ. Na pačatku studzienia jamu musili adkryć kredytnuju liniju na sumu, jakoj siamji nie stavała na budaŭnictva. Adnak u noč na 21 śniežnia Alaksandra Kłaskoŭskaha aryštavali. «Na atrymańnie kredytu nam nie chapiła litaralna dvuch tydniaŭ», — raspaviała žonka źniavolenaha Natalla.
Paśla aryštu muža žančyna zastałasia z tryma dziećmi na rukach. Natalla — u dekretnym adpačynku, i z usich prybytkaŭ u siamji tolki 285 tys. rub. dziaržaŭnaj dapamohi. Natalla havoryć, što kali b nie svajaki i siabry, nie viedaje, jak jany ŭvohule b isnavali.
Ciapier Natalla šukaje paručalnikaŭ na atrymańnie kredytu — budaŭnictva domu musić zaviaršycca sioleta ŭ śniežni. Ale, jak pryznałasia žančyna, na stanoŭčaje rašeńnie banku jana amal nie spadziajecca: «Viadoma, ja zrablu ŭsio, što ad mianie zaležyć, adnak u banku mnie ŭžo namiaknuli, što kredyt ja naŭrad ci atrymaju».
«Navat kali žonka zmoža ŭziać davieranaść ad muža i znojdzie paručalnikaŭ, šaniec atrymać kredyt zusim mizerny. Bo hałoŭny najmalnik siadzić u turmie, a siamja jość niepłaciežazdolnaju», — tłumačyć pracaŭnik adnaho ź mienskich bankaŭ.
Atrymlivajecca, što siamja Kłaskoŭskich i dalej budzie vymušanaja tulicca ŭ nievialičkaj dvuchpakajoŭcy baćkoŭ Alaksandra.
Były pracaŭnik milicyi Alaksandr Kłaskoŭski abvinavačvajecca pavodle artykułu ab masavych biesparadkach; taksama jaho vinavaciać u abrazie pradstaŭnika ułady (art. 369 KK) i samavolnym prysvajeńni zvańnia ci ŭłady słužbovaj asoby (art. 382 KK). Jamu pahražaje da 15 hadoŭ pazbaŭleńnia voli.
